Këshilli i Ministrave në mbledhjen e fundit ka miratuar vendimin për procedurat e rimbursimit të masave administrative të falura, të paguara për mosdeklarimin në regjistrin e pronarëve përfitues.
Sipas vendimit, Qendra Kombëtare e Biznesit përgatit listën e masave administrative të falura, të paguara, sipas parashikimeve të pikës 8, të nenit 15/1, të ligjit nr.112/2020, “Për regjistrin e pronarëve përfitues”, të ndryshuar.
Subjektet, të cilave u është falur gjoba e paguar, e vendosur ndaj tyre dhe përfaqësuesve të tyre ligjorë dhe kanë përmbushur detyrimet përkatëse për regjistrimin e pronarëve të tyre përfitues, paraqesin pranë Qendrës Kombëtare të Biznesit kërkesën për rimbursim, jo më vonë se data 15.12.2022, shoqëruar me dokumentacionin, si më poshtë vijon:
- a) Emrin/mbiemrin e individit/emërtimin e subjektit;
- b) ID kartën e identitetit/NIPT-in;
- c) IBAN-in;
ç) Emrin e bankës pranë së cilës kanë llogarinë personale/llogarinë e subjektit;
- d) vërtetimin bankar, që llogaria bankare ku do të arkëtohet kthimi i gjobës është aktive;
- dh) ekstraktin e regjistrit të të dhënave të pronarëve përfitues.
Qendra Kombëtare e Biznesit pas paraqitjes së dokumentacionit, brenda 60 (gjashtëdhjetë) ditëve kalendarike, kryen rimbursimin e gjobës në të njëjtën masë (ekuivalente në lekë) në llogarinë bankare, të përcaktuar nga subjekti përfitues.
Vendimi për anulimin dhe rimbursimin e gjobave për mosdeklarimin e pronarëve përfitues u mor në fund të vitit të kaluar, pasi qeveria shtyu afatin deri në qershor 2022 dhe të gjitha gjobat u anuluan dhe të gjitha ato që janë paguar do të rimbursoheshin.
Ligji “Për regjistrin e pronarëve përfitues”, parashikon që të gjitha subjektet raportuese të regjistruara në Republikën e Shqipërisë kanë detyrimin e regjistrimit të pronarëve përfitues në Regjistrin e Pronarëve Përfitues. Afati fillestar ishte data 30.6.2021, por që më pas u shty deri më 30 qershor të këtij viti për shkak të problemeve që u hasën me zbatimin e tij.
Gjoba për mosdeklarimin e pronarëve përfitues ishte fillimisht 500 mijë lekë dhe më pas u rrit në 600 mijë lekë.
Postimi ” Qeveria miraton vendimin se si do të rimbursohen gjobat e falura për pronarët përfitues ” eshte marre nga Revista Monitor.
