Qeveria shqiptare ka miratuar më 6 mars mbylljen e përkohshme të platformës TikTok për një vit në të gjithë territorin e Shqipërisë. Ky vendim, i cili prek mbi 1.5 milion përdorues, synon të mbrojë fëmijët dhe të rinjtë nga përmbajtjet që mund të nxisin akte dhune dhe bullizmi.
TikTok, i cili është një nga platformat më të përdorura nga të rinjtë shqiptarë, ka një audiencë të konsiderueshme në Shqipëri. Sipas të dhënave të Kepios, 35% e përdoruesve janë të rinj mes moshës 12-25 vjeç, duke e bërë këtë grup moshe dominues në përdorimin e platformës. Për më tepër, 52.7% e audiencës së reklamave të TikTok-ut në Shqipëri janë meshkuj, ndërsa 47.3% janë femra.
Vendimi u miratua pas një propozimi të kryeministrit Edi Rama në fund të vitit të kaluar dhe u ndërmorën konsultime të gjera me prindër, mësues dhe një grup ndërinstitucional. Ministrja e Arsimit, Ogerta Manastirliu, shpjegoi se mbyllja e përkohshme është një masë e nevojshme për të vendosur kushte dhe kritere që të garantojnë qasjen e sigurt në platformë.
“Është mbyllje e përkohshme e qasjes në TikTok. I kemi dhënë vetes deri në 12 muaj kohë që të marrim të gjitha masat e nevojshme në bashkërendim me përfaqësuesit e kësaj platforme, për të vendosur kushte dhe kritere që qasja në TikTok të mos dëmtojë fëmijët dhe të rinjtë. Agjencia Kombëtare e Sigurisë Kibernetike brenda disa ditëve apo javësh do të mundet të realizojë këtë ndërprerje të përkohshme të qasjes në TikTok,” tha Manastirliu.
Sipas saj, Policia e Shtetit ka raportuar një numër të lartë të videove dhe materialeve të publikuara në TikTok që nxisin akte dhune dhe bullizmi. Gjatë konsultimeve, rreth 65.000 prindër në mbi 1.300 takime janë shprehur në favor të mbylljes ose kufizimit të platformës.
Konsultimet me prindër dhe mësues filluan pas një ngjarjeje tragjike më 18 nëntor 2024, kur Martin Cani, një nxënës 9-vjeçar i shkollës “Fan Noli” në Tiranë, u vra me thikë nga një bashkëmoshatar. Megjithëse u konstatua më vonë se ngjarja nuk kishte lidhje direkte me TikTok, ajo shërbeu si një alarm për rreziqet që mund të paraqesin platformat sociale për të rinjtë.
TikTok, platforma e njohur e videove të shkurtra në pronësi të kompanisë kineze ByteDance, është në qendër të diskutimeve ndërkombëtare për shkak të shqetësimeve që rrethojnë sigurinë e të dhënave të përdoruesve.
Në fillim të këtij viti, Shtetet e Bashkuara vendosën një ndalim të përkohshëm të TikTok-ut, duke kërkuar që platforma të shkëputej nga partnerët e saj kinezë për shkak të rreziqeve të mundshme për sigurinë kombëtare.
Ekspertët e sigurisë kibernetike kanë theksuar gjithashtu se TikTok mund të ketë akses në të dhëna që shkojnë përtej atyre që përdoruesit e shohin në platformë./ A.T
Postimi ” Qeveria shqiptare mbyll TikTok për 1.5 milion përdorues për një vit ” eshte marre nga Revista Monitor.
