Qeveria shqiptare u bëri apel pak ditë më parë individëve që të investojnë në tituj qeveritarë, bono dhe obligacione, duke përfituar nga kushtet favorizuese të përfitimit që paraqesin ato aktualisht.
Apeli erdhi në një kohë kur qeveria po përfiton nga situata aktuale për të ristrukturuar borxhin publik por edhe në kushtet kur individët kanë pësuar një stepje në pjesën e dytë të vitit për të marrë pjesë në ankandet e qeverisë, pavarësisht normale të larta të fitimit.
Por cila është pesha e individëve në borxhin e brendshëm të qeverisë shqiptare?
Referuar të dhënave të Ministrisë së Financave, individët përbëjnë 10 % të peshës së mbajtësve të titujve qeveritare në tregun e brendshëm.
Në vend të parë janë bankat me rreth 63 % ndërsa në vend të dytë institucionet financiare me rreth 15 %. Në total, qeveria shqiptare ka planifikuar që për vitin 2022 të emetojë bono dhe obligacione në vlerë 33 miliardë lekë.
Por në pjesën e parë të vitit është realizuar vetëm një pjesë e vogël e tyre, rreth 4 miliardë lekë, duke bërë që spostohet në gjysmën e dytë të vitit një shumë relativisht e lartë për financimin e brendshëm të deficitit.
Për të marrë pjesë në ankandet e bonove, individët kanë dy opsione; sportelet e Bankës së Shqipërisë dhe sportelet e bankave tregtare, ku përmes çeljes së një llogarie mund të bëhen pjesë e tyre.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
