Samsung parashikon fitim rekord prej 80 miliardë dollarësh nga bumi i AI

Samsung Electronics parashikon një rritje prej 783% të fitimit operativ në tremujorin e tretë të vitit 2026, duke arritur një rekord prej rreth 80 miliardë dollarësh, teksa kërkesa e lartë për çipa të inteligjencës artificiale vazhdon të nxisë fitimet e industrisë së gjysmëpërçuesve. Prodhuesi më i madh në botë i çipave të memories pret që fitimi operativ për periudhën korrik-shtator të arrijë në 107.4 trilionë won, e barabartë me 80.2 miliardë dollarë, nga 12.17 trilionë won që ishte një vit më parë.

Të ardhurat e kompanisë koreanojugore parashikohet të regjistrojnë një rritje prej 127%, duke u ngjitur në 195 trilionë won dhe duke shënuar një tjetër rekord. Këto rezultate financiare tejkalojnë parashikimet e analistëve, duke pasqyruar rritjen e çmimeve të çipave të memories, ndërkohë që investimet globale në qendrat e të dhënave dhe inteligjencën artificiale po e tejkalojnë ritmin e zgjerimit të furnizimit.

Hovet i deritanishëm është nxitur nga kërkesa e lartë për çipat tradicionalë DRAM dhe NAND, si dhe për memoriet me kapacitet të lartë transmetimi të njohura si HBM, të cilat gjejnë përdorim në sistemet e avancuara të inteligjencës artificiale. Sipas parashikimeve, kufizimet në furnizim pritet të vazhdojnë përgjatë vitit 2027, duke mbështetur çmimet dhe përfitueshmërinë e prodhuesve.

Megjithatë, pavarësisht shifrave rekord, aksionet e Samsung shënuar rënie pas publikimit të këtyre parashikimeve, për shkak të shqetësimeve të investitorëve lidhur me qëndrueshmërinë e ritmit të rritjes. Forcimi i monedhës koreanojugore dhe ngadalësimi i mundshëm i rritjes së çmimeve të çipave mund të krijojnë presion mbi përfitueshmërinë gjatë tremujorëve të ardhshëm.

Nga ana tjetër, ndërsa sektori i gjysmëpërçuesve po gjeneron fitime të jashtëzakonshme, divizione të tjera të kompanisë po hasin vështirësi operacionale. Divizioni i telefonave inteligjentë ka shënuar humbje më të mëdha se pritshmëritë, kurse prodhimi i çipave me kontratë vazhdon të mbetet me humbje. Rritja e çmimeve të memories po përkthehet gjithashtu në kosto më të larta për prodhuesit e pajisjeve elektronike, çka tregon se bumi i inteligjencës artificiale po ndan tregun mes fituesve dhe humbësve brenda industrisë globale të teknologjisë.

Samsung do të publikojë pasqyrën e detajuar financiare më 29 tetor, datë kur investitorët do të mund të analizojnë kontributin e saktë të secilit divizion në shifrat rekord të kompanisë.