Hotelet në Kosovë kanë shënuar rritje të numrit të vizitorëve gjatë muajit gusht të vitit 2026, krahasuar me të njëjtën periudhë të vitit paraprak, ku kryesimin e mbajnë shtetasit nga Shqipëria.

Sipas të dhënave statistikore, gjatë këtij muaji në hotelet e vendit qëndruan 101.792 vizitorë, kundrejt 92.544 vizitorëve në gushtin e vitit 2025, duke shënuar një rritje prej 10%. Nga numri i përgjithshëm, 37.986 ishin vizitorë vendorë, ndërsa 63.806 ishin të huaj.

“Në Gusht 2026, numri i vizitorëve në hotele ishte 101 792 prej tyre vizitorë vendorë ishin 37 986 dhe vizitorë të jashtëm ishin 63 806. Krahasuar me muajin Gusht të vitit 2025 (sa ishin 92 544 vizitorë) pati rritje të numrit të përgjithshëm të vizitorëve në hotele për 10.0%. Numri i netë qëndrimeve ishte 212 411, prej tyre 135 740 (62.6%) nga vizitorët e jashtëm dhe 76 671 (ose 36.1%) vizitorët e brendshëm”, thuhet në publikimin e ASK-së.

Gjatë gushtit 2026, në strukturat akomoduese të vendit u regjistruan gjithsej 212.411 netëqëndrime. Numri i netëqëndrimeve nga vizitorët e huaj u rrit për 17.5%, duke arritur në 135.740, krahasuar me 115.537 netëqëndrime në gushtin e vitit 2025. Ndërkohë, vizitorët vendorë realizuan 76.671 netëqëndrime, nga 76.874 sa kishin qenë një vit më parë.

Statistikat sipas vendeve të origjinës

Shqipëria ishte vendi prej nga erdhi numri më i madh i vizitorëve të huaj gjatë kësaj periudhe. Nga Shqipëria u regjistruan 12.291 vizitorë, krahasuar me 9.637 në gushtin e vitit 2025, duke shënuar një rritje prej 27.5%.

Pas Shqipërisë, vizitorët nga Gjermania u renditën me 10.219 vizitorë, nga 9.898 sa ishin një vit më parë, që përbën një rritje prej 3.2%. Rritje u regjistruan gjithashtu edhe nga Zvicra me 5.633 vizitorë (rritje 7.9%) dhe nga Turqia me 4.004 vizitorë (rritje 10.5%). Përkatësisht, vendet e tjera sollën 31.658 vizitorë në hotele, me një rritje prej 1.8%.

“Sa u përket vizitorëve të huaj ne muaj Gusht 2026, krahasuar me periudhën paraprake (Gusht 2025) pati një rritje të vizitorëve për 7.3%. Në total, 63 806 vizitorë të huaj, nga të cilët numri më i madh ishte nga: Shqipëria, Gjermania, Zvicra, Turqia etj”, bëhet e ditur në të dhëna.

Rritja më e theksuar në netëqëndrime u shënua nga vizitorët e Shqipërisë, të cilët realizuan 26.418 netëqëndrime në gusht 2026, kundrejt 16.039 një vit më parë, duke shënuar një hov prej 64.7%. Vizitorët nga Gjermania realizuan 22.484 netëqëndrime (rritje 9%), ndërsa ata nga Turqia arritën në 7.612 netëqëndrime (rritje 36.4%). Në krahun tjetër, netëqëndrimet nga Zvicra shënuan rënie prej 6%, duke zbritur në 10.019 netëqëndrime, ndërsa vendet e tjera shënuan 69.208 netëqëndrime ose 10.5% më shumë se në gushtin e vitit 2025.