16.5 C
Tirana
E diel, 25 Shkurt 2024

Shtrenjtohen kreditë, qytetarët dhe sipërmarrësit që po trokasin më rrallë në banka për hua

Duhen Lexuar

Ky nuk është momenti më i mirë për të marrë kredi. Ky nuk është vetëm rekomandim ekspertësh. E tregon edhe realiteti me qytetarët dhe sipërmarrësit shqiptarë që po trokasin më rrallë nëpër banka për të marrë hua.

Sipas Bankës së Shqipërisë, kredia e re në tetor ra në 19.7 miliardë lekë, nga 22.6 që ishte vjet apo rreth 21.8 miliardë në tetorin e 2019-s, kur pandemia nuk kishte mbërritur.

Ndikim këtu ka pasur edhe kërkesa më e ulët për kredi nga individët. Huatë e reja në tetor ranë në më pak se 5.9 miliardë lekë nga gati 6.6 miliardë vitin e shkuar.

Një nga arsyet kryesore ka të bëjë me interesat e larta, që po ndikohen nga rritja e normës bazë të interesit për lekun nga Banka e Shqipërisë.

Shtrëngimi i politikës monetare u bë për të frenuar inflacionin, por kjo ka bërë që norma e interesit për kreditë e reja në monedhën kombëtare të rriten në gati 7.5 për qind në tetor. Në të njëjtën periudhë të viteve paraardhëse, ajo ishte më pak se 6 për qind.

“Por sigurisht edhe nivelet e inflacionit, ndikojnë në kërkesën për kredi. Ky nuk është një moment i mirë pasi edhe besimi në ekonomi nuk është në nivelet më të larta. Sigurisht që e ardhmja shihet me shqetësim”, thotë Brunilda Isai.

Rritja e çmimeve ende nuk ka prekur kulmin dhe Banka Qendrore ka paralajmëruar për rritje të tjera të normës bazë të interesit. Kjo rrjedhimisht do të shtrenjtojë edhe më tej kreditë.

“Ende nuk kemi arritur kurbën rënëse ose së paku stabilizimin e çmimeve. Kështu që për shkak të kësaj ecurie, Banka e Shqipërisë mund të shtrëngojë edhe më tej politikën monetare”, shton Isai.

Ndaj ekspertët kanë një këshillë për ata që planifikojnë që të marrin një kredi për të blerë shtëpi apo investuar në të tjera nevoja.

 “Ky nuk është momenti i duhur. Gjithçka është më e shtrenjtë. Nëse vendimi për marrjen e kredisë ka mundësi për t’u shtyrë, do të ishte i duhuri”, thekson ajo.

Banka Qendrore ka rritur pesë herë brenda këtij viti normën bazë të interesit, duke arritur në nëntor arriti në 2.75 për qind.

Ajo ndikoi në shtrenjtimin e interesave për bonot e thesarit. Ky është një element kryesor mbi të cilin bankat llogarisin interesat e kredive në lekë. Ato kanë kërcyer mesatarisht në tetor në 5.8 për qind nga 1.71 që ishte një vit më parë. Kjo e ka rritur me 3.4 herë pjesën e interesit që paguajmë në çdo këst.

E thënë thjesht, si qytetarët dhe sipërmarrësit shqiptarë që planifikojnë të marrin kredi, por edhe ata që e kanë një ekzistuese, do t’i kenë më të rritura pagesat e përmuajshme.

Burimi: A2 CNN

- Reklama -
spot_img
- Reklama -

Artikujt e Fundit