Banka e Shqipërisë ka përditësuar strategjinë afatmesme të zhvillimit, për periudhën 2025-2027. Në dokumentin e ri, konfirmohen objektivat e përafrimit të mëtejshëm të kuadrit rregullator me atë të Bashkimit Europian.
Ndër objektivat kryesorë, është edhe adoptimi i standardeve të mbikëqyrjes sipas Bazel III dhe akteve të tyre zbatuese në Bashkimin Europian, veprim që synon forcimin e qëndrueshmërisë së sektorit bankar për përthithjen e goditjeve, në mënyrë që bankat të vazhdojnë të financojnë aktivitetin dhe rritjen ekonomike.
Gjithashtu, Banka e Shqipërisë do të vazhdojë përditësimin e kuadrit për mjaftueshmërinë e
kapitalit dhe kapitalin rregullator, për sa i përket rrezikut të kredisë, rrezikut të tregut, rrezikut
operacional, dhe rrezikut të normës së interesit në librin e bankës.
Gjithashtu, parashikohet rishikimi i kërkesave për procesin e vlerësimit të brendshëm të mjaftueshmërisë së kapitalit (perspektiva normative dhe ekonomike) në kuadër të procesit të brendshëm të mjaftueshmërisë së likuiditetit për bankat.
Banka e Shqipërisë parashikon edhe përditësim të kuadrit rregullator për mbikëqyrjen e rrezikut operacional dhe rrezikut të teknologjisë së informacionit dhe komunikimit dhe rrezikut kibernetik.
Strategjia përfshin adoptimin e standardeve ndërkombëtare për vlerësimin e mjaftueshmërisë së perimetrit të sigurisë ndaj sulmeve kibernetike dhe të vijueshmërisë së veprimtarisë së subjekteve të licencuara.
Në këtë drejtim, synohet gjithashtu rritja e bashkëpunimit me bankat për mbrojtjen ndaj sulmeve kibernetike dhe kontributi aktiv në strukturat e industrisë bankare për shkëmbimin e informacionit dhe bashkërendimin e reagimit, në kohë reale, ndaj çdo incidenti.
Gjithashtu, Banka Qendrore do të do të synojë hartimin e instrumenteve të reja për të llogaritur kërkesat e diferencuara të kapitalizimit të bankave të veçanta, në përputhje me profilin e tyre të rrezikut.
Në strategjinë parashikohet hartimi i instrumenteve metodologjike dhe operacionale për një kalibrim më të mirë të kërkesave për kapital të diferencuar, në përputhje me profilin e rrezikut të çdo banke. Sipas dokumentit, metodologjitë e reja do të zbatohen paralelisht me ato ekzistuese gjatë një periudhe kalimtare.
Përveç kërkesave që kuadri ligjor dhe rregullator për bankat përcakton për të gjitha bankat tregtare apo për grupe të veçanta të tyre (kryesisht bankat me rëndësi sistemike), Banka e Shqipërisë ka të drejtë të kërkojë për banka të veçanta aplikimin e niveleve të diferencuara në raportin e mjaftueshmërisë së kapitalit.
Të tilla nivele janë aplikuar në dekadën e fundit për banka që paraqisnin elementë specifikë ose shtesë rreziku, për shembull bankat me kapital aksioner grek, pas krizës që përfshiu ekonominë e vendit fqinj.
Në tërësi, kërkesat për kapital janë rritur ndjeshëm ndaj sektorit bankar, pas aplikimit gradual në pesë vitet e fundit të shtesave makroprudenciale dhe të atyre të lidhura me kërkesën minimale për instrumente të kapitalit rregullator dhe detyrime të pranuara (MREL).
Sipas statistikave të Bankës së Shqipërisë, raporti i mjaftueshmërisë së kapitalit arriti në 20.2%, nga 19.3% që kishte qenë në tremujorin e mëparshëm dhe 19.6% që kishte qenë në të njëjtën periudhë të vitit të kaluar.
Postimi ” Strategjia afatmesme, BSH parashikon forcim të mëtejshëm të rregullimit bankar ” eshte marre nga Revista Monitor.
