10.5 C
Tirana
E shtunë, 24 Shkurt 2024

Turizmi mbetet 22% poshtë niveleve të parakrizës, tre dozat frenojnë shtetasit e Kosovës 

Në janar të vitit 2022 hynë gjithsej 194 mijë shtetas të huaj në vend.

Duhen Lexuar

Ndonëse në raport me një vit më parë, hyrjet e shtetasve u rritën me 4.8%, sërish lëvizjet e turistëve mbeten poshtë niveleve të parakrizës, sipas shifrave të publikuara nga INSTAT.

Në krahasim me janar 2020, pak përpara se në mbarë globin të shpërthente pandemia që kufizoi lëvizjet, hyrjet e shtetasve janë 22% më të ulëta.

Ndikimin kryesor në këtë ecuri të dobët e kanë dhënë shtetasit nga Kosova, hyrjet e të cilëve ranë me 28% në krahasim me janarin 2021 dhe 18% me janarin 2020. Ndikimin kryesor në këtë ecuri e dha vendimi i qeverisë së Kosovës për të pasur tre doza vaksine dhe tampon PCR për të hyrë në territorin e Kosovës , çka stepi lëvizjet e shtetasve që përgjithësisht vijnë në Shqipëri për të kaluar fundjavën.

Shtetasin e Kosovës mbajtën peshën kryesore në turizmin shqiptar gjatë pandemisë. Pesha e tyre në periudhën 2020-2021 arriti në rreth 50% të totalit të hyrjeve, nga rreth 34-35% që ishte para pandemisë. Por, në janar 2022, kjo peshë u reduktua sërish në 33%.

Rënia e shtetasve nga Kosova u kompensua nga hyrjet më të lartë të shtetasve nga Italia dhe Greqia që përkatësisht u dyfishuan dhe trefishuan, por sërish mbeten më poshtë niveleve të parapandemisë.

Në rritje të ndjeshme ishin dhe hyrjet e shtetasve nga Gjermania, Anglia, Polonia, SHBA në raport me janarin 2021, por që  gjithsesi mbeten shumë të ulët në numër (shih grafikun: Hyrjet e shtetasve të Huaj, janar).

Sipas INSTAT, në Janar 2022, nga vendet që kanë hyrjet më të larta të shtetasve në Shqipëri, Spanja ka pasur rritjen më të madhe me 4,8 herë dhe Greqia me 3,8 herë, ndërsa Zvicra ka pasur rënien më të ndjeshme me 33,8%, krahasuar me të njëjtën periudhë të vitit 2021.

Rriten daljet e shtetasve shqiptarë 

INSTAT raportoi se Daljet e shtetasve shqiptarë dhe të huaj nga territori i Shqipërisë, gjatë muajit Janar 2022, janë 607.351, duke shënuar një rritje me 34,8%, krahasuar me të njëjtën periudhë të një viti më parë.

Daljet e shtetasve shqiptarë nga territori i Shqipërisë, gjatë muajit Janar 2022, janë 371.920. Krahasuar me Janar 2021, ky numër është rritur me 36,9%. Daljet e shtetasve të huaj nga territori i Shqipërisë gjatë muajit Janar 2022, janë 235.431. Krahasuar me Janar 2021, ky numër është rritur me 31,6%.

Burimi:Monitor
- Reklama -
spot_img
- Reklama -

Artikujt e Fundit