Rreth 22 ditë kalendarike është afati i lënë në dispozicion të bizneseve që do të kërkojnë të aplikojnë për lidhjen e marrëveshjes së paqes fiskale. Periudha e aplikimit ka nisur ditën e premte më 15 Maj dhe mbyllet më 5 Qershor 2026.
Pas miratimit të udhëzimit të Ministrisë së Financave për procedurat e zbatimit të marrëveshjes së paqes fiskale, është miratuar Udhëzimi i Drejtorisë së Përgjithshme të Tatimeve (DPT), që përcakton afatet e aplikimit, procedurat që ndiqen online në e-Fling, dhe dokumentet që do të depozitohen nga bizneset e interesuara.
Udhëzimi si do të zbatohet paqja fiskale, shembujt si do të llogariten këstet e tatimit
Në udhëzim përcaktohet se aplikimet që do të dorëzohen pas datës 5 Qershor do të refuzohen. Afati është i vlefshëm edhe për bizneset që do të rideklarojnë pasqyrat.
Udhëzimi i DPT-së përcakton se pas lidhjes së marrëveshjes dhe rideklarimit/korrigjimit të deklaratave vjetore përkatëse, bizneset kanë afat që brenda 30 Qershorit 2026 të kryejnë pagesën e tatimit dhe të të dorëzojnë pasqyrat financiare të rideklaruara në format PDF dhe Excel, të nënshkruara nga përfaqësuesi ligjor/administratori ose personi fizik.
Por bizneset ngrenë shqetësimin se afati i lejuar është i shkurtër, nisur nga situata me mosfunksionimin e-Albania për disa ditë, për shkak të një procesi përditësimi dhe optimizimi teknik të infrastrukturës teknologjike. Sipas njoftimit zyrtar të publikuar më herët ndërprerja e shërbimeve elektronike do të nisë më 15 maj në orën 22:00 dhe do të zgjasë deri më 18 maj në orën 08:00.
Aplikimet për marrëveshjen dhe rideklarimin e pasqyrave do të behen në e-Filing
Ashtu siç është lajmëruar edhe më parë aplikimet do të bëhen online në e-Filing ku do të krijohet shërbimi “Aplikim për marrëveshjen e paqes fiskale”. Për të dyja rastet si për lidhjen e paqes fiskale dhe rideklarimit të pasqyrave tatimpaguesit duhet të plotësojnë online formularin.
Udhëzimi i DPT-së përcakton se tatimpaguesit që plotësojnë kushtet ligjore paraqesin kërkesën elektronikisht nëpërmjet sistemit e-filing, në rubrikën: “Çështjet e mia” → “Pyetje e përgjithshme”, duke vendosur titullin: “Aplikim për Marrëveshjen e Paqes Fiskale” dhe duke ngarkuar formularin e aplikimit “Për lidhjen e Marrëveshjes së Paqes Fiskale”, të plotësuar sipas shtojcës nr. 1, bashkëlidhur Udhëzimit nr. 10, datë 14.05.2026, “Për procedurat e marrëveshjes së paqes fiskale”.
Aplikimi konsiderohet i dorëzuar në momentin e konfirmimit të regjistrimit nga sistemi dhe marrjes së një numri unik të çështjes.
Edhe pasqyrat e rideklaruara duhet të dorëzohen me çështje në e-filing me emërtimin:
“Ndryshimi i pasqyrave financiare sipas Ligjit nr. 84/2025, ‘Për Marrëveshjen e Paqes Fiskale’, për vitin: 2023, 2024, 2025”.
Udhëzim për përcaktimin e afatit dhe procedurën e aplikimit për lidhjen e marrëveshjes së paqes fiskale për vitin tatimor 2026
Në zbatim të pikës 1 të nenit 11 dhe pikës 2 të nenit 14 të Ligjit nr. 84/2025, “Për Marrëveshjen e Paqes Fiskale”, si dhe me qëllim garantimin e zbatimit të njëtrajtshëm të procedurës së aplikimit për vitin e parë tatimor të zbatimit të këtij ligji, Drejtoria e Përgjithshme e Tatimeve harton këtë udhëzim, i cili synon zbatimin në praktikë të detyrimeve ligjore të parashikuara, përcaktimin e veprimeve konkrete dhe afateve procedurale lidhur me aplikimet për lidhjen e Marrëveshjes së Paqes Fiskale për vitin e parë tatimor të zbatimit të këtij ligji.
1. Afati i aplikimit
Për vitin tatimor 2026, aplikimi për lidhjen e Marrëveshjes së Paqes Fiskale mund të kryhet elektronikisht nga data 15.05.2026 deri më datë 05.06.2026. Aplikimet e kryera pas këtij afati do të refuzohen.
2. Mënyra e aplikimit
Tatimpaguesit që plotësojnë kushtet ligjore paraqesin kërkesën elektronikisht nëpërmjet sistemit e-filing, në rubrikën: “Çështjet e mia” → “Pyetje e përgjithshme”, duke vendosur titullin: “Aplikim për Marrëveshjen e Paqes Fiskale” dhe duke ngarkuar formularin e aplikimit “Për lidhjen e Marrëveshjes së Paqes Fiskale”, të plotësuar sipas shtojcës nr. 1, bashkëlidhur Udhëzimit nr. 10, datë 14.05.2026, “Për procedurat e marrëveshjes së paqes fiskale”.
Aplikimi konsiderohet i dorëzuar në momentin e konfirmimit të regjistrimit nga sistemi dhe marrjes së një numri unik të çështjes.
3. Plotësimi i dokumentacionit
Në rast se gjatë verifikimit paraprak konstatohet mungesë apo pasaktësi e të dhënave të deklaruara, tatimpaguesi njoftohet elektronikisht për plotësimin e tyre brenda një afati prej 3 ditësh pune. Mosplotësimi i dokumentacionit brenda këtij afati sjell mospranimin (refuzimin) e aplikimit.
4. Trajtimi i aplikimit dhe njoftimi i rezultatit
Pas verifikimit të kushteve ligjore sipas Ligjit nr. 84/2025 “Për Marrëveshjen e Paqes Fiskale” dhe Udhëzimit nr. 10, datë 14.05.2026, “Për procedurat e marrëveshjes së paqes fiskale”, të dalë në zbatim të tij, brenda 5 ditëve kalendarike, por jo më vonë se data 10.06.2026, vendimmarrja mbi aplikimin i komunikohet tatimpaguesit në mënyrë elektronike në llogarinë e tij në sistemin e-filing.
Në rastin e plotësimit të kushteve ligjore, hartohet “Marrëveshja e Paqes Fiskale”, e cila nënshkruhet nga titullari i drejtorisë rajonale tatimore ku tatimpaguesi është i regjistruar dhe i vihet në dispozicion tatimpaguesit.
Brenda 5 ditëve kalendarike, por jo më vonë se data 15.06.2026, dokumenti i nënshkruar nga përfaqësuesi ligjor/administratori i tatimpaguesit ose personi fizik dorëzohet me çështje në e-filing.
Aplikuesit të cilët, në formularin e aplikimit për lidhjen e Marrëveshjes së Paqes Fiskale, kanë deklaruar se do të kryejnë rideklarimin e pasqyrave financiare për një ose disa nga vitet tatimore sipas përcaktimit në ligj (2023, 2024, 2025), pas lidhjes së marrëveshjes dhe rideklarimit/korrigjimit të deklaratave vjetore përkatëse, brenda datës 30.06.2026 duhet:
Të kryejnë pagesën e tatimit në kuptim të Ligjit nr. 84/2025 “Për Marrëveshjen e Paqes Fiskale”, për çdo vit tatimor për të cilin është ndryshuar deklarata tatimore, për deklaratat e viteve 2023, 2024 dhe 2025.
Të dorëzojnë pranë Drejtorisë Rajonale Tatimore të juridiksionit, elektronikisht në e-filing, formularin e aplikimit për rideklarimin e elementeve të veçanta të aktiveve, detyrimeve apo kapitaleve të veta të pasqyrave financiare vjetore, sipas shtojcës nr. 2 të Udhëzimit nr. 10, datë 14.05.2026, “Për procedurat e marrëveshjes së paqes fiskale”.
Të dorëzojnë pasqyrat financiare të rideklaruara në format PDF dhe Excel, të nënshkruara nga përfaqësuesi ligjor/administratori ose personi fizik.
Pasqyrat e rideklaruara duhet të dorëzohen me çështje në e-filing me emërtimin:
“Ndryshimi i pasqyrave financiare sipas Ligjit nr. 84/2025, ‘Për Marrëveshjen e Paqes Fiskale’, për vitin: 2023, 2024, 2025”.
Për çdo ndryshim të kryer në pasqyrat financiare duhet të bëhen sqarimet përkatëse bazuar në legjislacionin për kontabilitetin.
Administrata tatimore rezervon të drejtën për të kërkuar informacione shtesë në lidhje me ndryshimet e reflektuara në pasqyrat financiare dhe deklaratat vjetore përkatëse.
Udhezim per afatin_Paqja Fiskale
Postimi ” Udhëzimi i Tatimeve: Aplikimet për Paqen Fiskale mbyllen më 5 Qershor, pas këtij afati do refuzohen ” eshte marre nga Revista Monitor.
