Banka Qendrore e Kosovës ka mirëpritur procedimin në Kuvend të ndryshimeve ligjore që synojnë parandalimin e pastrimit të parave dhe luftimin e financimit të terrorizmit. Miratimi i këtyre ndryshimeve dhe hyrja e tyre në fuqi pritet t'i hapin rrugë aplikimit final të Kosovës në Zonën e Vetme të Pagesave në Euro, e njohur si SEPA.
Sipas institucionit financiar, pjesa kryesore e përgatitjeve institucionale dhe rregullative për këtë proces tashmë ka përfunduar. Pas hyrjes në fuqi të paketës ligjore, planifikohet miratimi i dy rregulloreve përfundimtare që lidhen ngushtë me kërkesat e anëtarësimit.
Përfshirja e vendit në këtë zonë pritet të ulë ndjeshëm kostot e transaksioneve ndërkufitare. Vlerësimet e BQK-së tregojnë se kursimet vjetore mund të kalojnë shifrën e 55 milionë eurove, duke sjellë lehtësim të drejtpërdrejtë për remitancat, bizneset, si dhe për eksportuesit dhe importuesit.
Pagesat në monedhën euro me shtetet anëtare të SEPA-s do të kryhen në mënyrë më të shpejtë, më efikase dhe me shpenzime operative më të ulëta. Kjo nismë vlerësohet si një ndër reformat kyçe për modernizimin e infrastrukturës financiare të vendit dhe përafrimin e saj me standardet e Bashkimit Europian.
Krahas këtij procesi, banka qendrore po zhvillon edhe sistemin e pagesave të shpejta të njohur si TIPS Clone. Të dyja reformat kanë për qëllim përmirësimin e shërbimeve të pagesave, nxitjen e konkurrencës dhe inovacionit, duke u siguruar qytetarëve dhe kompanive akses në shërbime të ngjashme me ato të tregut europian.
