Kosova ka ndërmarrë një hap të ri drejt rritjes së transparencës financiare dhe luftimit të paligjshmërisë, duke ulur kufirin e transaksioneve me para të gatshme ndërmjet bizneseve nga 500 euro në 300 euro. Ky ndryshim u njoftua nga ministri i Financave, Hekuran Murati, gjatë një aktiviteti në kuadër të Procesit të Berlinit.
Sipas ministrit, përdorimi i sasive të mëdha të parave cash e bën të vështirë ndjekjen e transaksioneve dhe verifikimin e burimit të fondeve. Me vendosjen e rregullave të reja, çdo transaksion ndërmjet subjekteve tregtare që kalon vlerën 300 euro detyrohet të kalojë përmes sistemit bankar. Ndërkohë, për marrëdhëniet tregtare mes bizneseve dhe konsumatorëve, kufiri i lejuar i pagesave me para në dorë është përcaktuar në 2 mijë euro.
Hekuran Murati theksoi se këto masa synojnë reduktimin e qarkullimit të likuiditetit të padeklaruar, forcimin e transparencës dhe nxitjen e formalizimit të ekonomisë. Gjatë fjalës së tij, ai preku edhe sektorin e monedhave digjitale, duke konfirmuar se Banka Qendrore e Kosovës ka nisur procedurat për licencimin dhe rregullimin e veprimtarisë së operatorëve të kriptovalutave.
