Bashkia e Përmetit ka nisur procedurën e prokurimit për rikonstruksionin e infrastrukturës rrugore në territorin e saj, me një fond limit prej 30 milionë e 362 mijë lekësh. Investimi parashikon ndërhyrje në gjashtë akse rrugore, me një gjatësi totale prej rreth 2.3 kilometrash, sipas dokumentacionit të publikuar në Agjencinë e Prokurimit Publik.
Rrugët që përfshihen në projekt
Punimet do të shtrihen si në qytet, ashtu edhe në fshatrat përreth. Konkretisht, projekti përfshin:
- rrugën “Nexhip Bënja” në qytet;
- rrugën “e Përmetit” në qytet;
- rrugën e Bualit;
- rrugën e mesit në Kaludh;
- rrugën e Biovizhdës;
- rrugën qendrore në Çarçovë.
Çfarë parashikon projekti teknik
Sipas projektit teknik, të gjashtë segmentet kërkojnë përmirësim të shtresave rrugore. Ndërhyrjet nuk do të kufizohen vetëm te asfaltimi, por do të përfshijnë edhe sistemet e kanalizimeve dhe trotuaret.
Dokumenti thekson se nuk parashikohen shpronësime, pasi të gjitha punimet do të kryhen brenda gjurmës ekzistuese të rrugëve. Shtresat e projektuara synojnë t’u garantojnë segmenteve qëndrueshmëri dhe funksionalitet për një periudhë projektimi 20-vjeçare.
Sipas Agjencisë së Prokurimit Publik, përmes këtij investimi synohet përmirësimi i kushteve të lëvizjes për banorët, rritja e sigurisë rrugore dhe lehtësimi i aksesit në zonat e përfshira.
