Fondi Shqiptar i Zhvillimit (FSHZH) ka përcaktuar fituesit e tenderit për përmirësimin e shtresave asfaltike në gjashtë qarqe të vendit. Oferta fituese është 734.4 milionë lekë, rreth 7.8 milionë euro. Kontratën e ka marrë një bashkim prej katër kompanish, që ofroi një çmim rreth 41% më të ulët se fondi limit i procedurës.

Në njoftimin e datës 13 tetor, fitues i procedurës "Ndërhyrje për përmirësimin e shtresave asfaltike – Faza V" shpallet bashkimi i kompanive "Shkëlqimi 07", "R.S.&M", "Grand Konstruksion M" dhe "FLED". Projekti mbulon qarqet Elbasan, Korçë, Berat, Vlorë, Fier dhe Gjirokastër.

Gara dhe ofertat

Fondi limit i tenderit ishte vendosur në 1.25 miliardë lekë pa TVSH, ose rreth 13.3 milionë euro. Në garë konkurruan 12 operatorë dhe bashkime operatorësh ekonomikë. Në vlerësimin përfundimtar, bashkimi fitues mori 292.8 pikë. Vendin e dytë e zuri kompania "Alb-Star", me ofertë prej 740.9 milionë lekësh dhe 263.1 pikë.

Çfarë parashikojnë punimet

Raporti teknik i projektit thekson se ndërhyrjet do të fokusohen në rehabilitimin e segmenteve rrugore me dëmtime të shtresave asfaltike dhe ku qarkullimi i automjeteve haset me vështirësi. Akset konkrete do të përzgjidhen nga FSHZH pas verifikimeve në terren, duke mbajtur parasysh edhe kërkesat dhe prioritetet e njësive të vetëqeverisjes vendore. Përparësi do t'u jepet gjithashtu rrugëve që lidhin zonat turistike dhe territoreve me potencial për zhvillim ekonomik.

Punimet përfshijnë:

  • frezimin e asfaltit ekzistues;
  • shtrimin e shtresave të reja asfaltike;
  • përforcimin e strukturës rrugore në segmentet me dëmtime më të thella;
  • sistemimin e kanaleve kulluese dhe bankinave.

Sipas gjendjes teknike të çdo rruge, ndërhyrjet mund të shkojnë nga riparime sipërfaqësore deri te rindërtimi i shtresave rrugore aty ku dëmtimet janë të konsiderueshme. Projekti përfshin edhe punime për kullimin e ujërave në zonat e banuara dhe në segmentet me pjerrësi të madhe, ku do të ndërtohen kuneta, bordura dhe elemente të tjera të sistemit të drenazhimit.

Afati dhe financimi

Procedura është zhvilluar si marrëveshje kuadër me kohëzgjatje 24 muaj. Financimi i saj është parashikuar në programet buxhetore për periudhën 2026-2028.