Mundësia për të rritur pensionet dhe zbutur deficitin e skemës përmes ‘Fondi Sovran’ që do të krijohet bazuar në suksesin e zbulimit të naftës në Spiprag, është reale. Por që kjo të ndodhë duhet që paratë e fondit të shkojnë në investime të qëndrueshme dhe afatgjata. Në një intervistë për emisionin ‘INSIDER’ me gazetarin Angelo Haruni, profesori Adrian Civici shpjegon se si mund të realizohet kjo.
“I gjithë fondi që parashikohet të jetë diku mes 300-500 milion dollarë mund të investohet dhe fitimi i realizuar, që mund të shkojë deri në 50 milion euro në vit, mbi bazën e përqindjes që e përcakton vetë qeveria, mund të shkojë për politika sociale. Këtu sigurisht e para mund të jetë rritja e pensioneve. Por që kjo të ndodhë duhet që qeveria ta investojë fondin në investime të sigurta dhe afatgjata. Kjo do të krijonte qëndrueshmëri edhe për vetë financimin e rritjes së pensioneve”, thotë Civici.
Sipas Civicit praktikat botërore në këtë drejtim janë disa dhe rasti më i sukseshëm është ai i Norvegjisë. “Fondi norvegjez, që është një i mirënjohur, pasi ai ka një vlerë prej 1 trilion dollarë. I gjithë ky fond investohet jashtë vendit dhe sjell çdo vit deri 120 miliadë dollarë fitime, të cilat qeveria norvegjeze i përdor të gjitha për politika sociale”, sqaron Civici.
Për shkak të problemeve demografike, skema shqiptare e pensioneve subvencionohet nga buxheti i shtetit me rreth 450 milion dollarë në vit. Por falë realizimit të mirë të të ardhurave buxhetore, qeveria vitet e fundit ka mundur të rrisë dhe indeksojë pensionet.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
