Tregu grek i sigurimeve kundër rreziqeve elektronike dhe online ka shënuar një zgjerim të fortë. Në vitin 2025 numri i policave arriti në 398 mijë, krahasuar me vetëm 208 mijë një vit më parë, çka përkthehet në një rritje prej 90%, sipas anketës së kryer mes siguruesve.
Pjesën dërrmuese të kontratave e përbëjnë individët: nga totali prej 398 mijë policash, 395 mijë janë lidhur nga persona fizikë, ndërsa 2,800 nga bizneset. Fondet totale të mbulimit maksimal u ngjitën në 3.95 miliardë euro gjatë vitit 2025.
Siguria dixhitale, faktor kritik për bizneset
Sulmet kibernetike sot përbëjnë kërcënim për çdo sipërmarrje dhe individ, pavarësisht përmasave. Në këtë kontekst, mbrojtja dixhitale dhe sigurimi kibernetik po kthehen në elementë gjithnjë e më thelbësorë të menaxhimit të riskut dhe të garantimit të funksionimit të biznesit.
Shoqata e Kompanive të Sigurimit të Greqisë thekson se siguria dixhitale është shndërruar në faktor kritik për vazhdimësinë e aktivitetit, ndërkohë që sigurimi kibernetik po merr peshë si instrument për përballimin e pasojave financiare të një sulmi. Sipas drejtuesve të shoqatës, mbulimi që u ofrohet bizneseve lidhet drejtpërdrejt me nivelin e infrastrukturës dhe të sistemeve të tyre mbrojtëse.
Çfarë mbulojnë policat
Në varësi të kushteve të secilës kontratë, sigurimi kibernetik mund të përballojë një gamë të gjerë dëmesh financiare. Ndër to përfshihen:
- restaurimi ose rikuperimi i të dhënave;
- rikthimi në funksion i sistemeve dhe softuerëve të informacionit;
- kostot e konsulentëve të specializuar teknikë dhe ligjorë;
- menaxhimi i incidenteve të shkeljes së të dhënave dhe njoftimi i klientëve;
- rivendosja e reputacionit të korporatës.
Rëndësi të veçantë ka mbulimi për humbjen e fitimeve si pasojë e ndërprerjes së aktivitetit. Kur një sulm kibernetik e bën të pamundur përkohësisht funksionimin e një biznesi, polica mund të sigurojë kompensim për të ardhurat e humbura.
