Transporti hekurudhor në Kosovë pritet të ndalet sot, më 9 nëntor, si pasojë e grevës së paralajmëruar nga organizatat sindikale të Infrakos, ndërmarrjes që menaxhon infrastrukturën hekurudhore.
Operatori i transportit, Trainkos, ka bërë të ditur se treni nr. 4201, me nisje nga Prishtina në orën 07:50, nuk do ta përfundojë rrugën e zakonshme, por do të ndalojë në Fushë-Kosovë. Arsyeja është se Infrakos pritet të ndalë ofrimin e shërbimeve infrastrukturore në orën 08:00.
Linjat pezullohen deri në normalizim
Sipas njoftimit të kompanisë, pas këtij treni të gjitha linjat e tjera do të mbeten të pezulluara derisa situata të normalizohet. Trainkos u ka kërkuar udhëtarëve mirëkuptim dhe ka siguruar se shërbimet do të rifillojnë sapo të krijohen kushtet e nevojshme.
“Trainkos Sh.A. kërkon mirëkuptimin e të gjithë udhëtarëve për këtë situatë të krijuar jashtë mundësive tona operative dhe rikonfirmon përkushtimin e saj për rikthimin e shërbimeve të transportit hekurudhor sa më parë që të krijohen kushtet. Për çdo ndryshim tjetër do t’ju njoftojmë me kohë”
thuhet në njoftimin zyrtar të Trainkos-it.
Kërkesat e punëtorëve
Greva ishte paralajmëruar nga punëtorët e Infrakos që gjatë protestës së 26 tetorit, e cila u mbajt para stacionit hekurudhor në Fushë-Kosovë. Ata kërkojnë:
- indeksimin e pagave;
- përmirësimin e kushteve të punës;
- rritjen e sigurisë.
Punëtorët akuzojnë bordin dhe menaxhmentin e ndërmarrjes se nuk i kanë përmbushur kërkesat e tyre, gjë që i ka shtyrë drejt ndërprerjes së punës.