Inflacioni në eurozonë nuk ka arritur ende kulmin dhe rrezikon të jetë dhe më i lartë se sa pritshmëritë aktuale. Deklarata u bë nga presidentja e Bankës Qendrore Europiane, Christine Lagarde, e cila la të kuptohej se do të ketë një seri rritjesh të reja të normave të interesit në të ardhmen.
Fjalët e saj së bashku me deklaratën e kreut të bankës qendrore holandeze, Klaas Knot, vijnë në momentin e duhur për të shuar spekulimet se BQE ishte gati të merrte një rrugë më të butë me rritjet e ardhshme të normës.
Inflacioni në eurozonë arriti në një rekord prej 10.6% në bazë vjetore muajin e kaluar, por ekonomistët e pyetur nga Reuters u shprehën se presin që ai të ulet në nivelin e 10.4%. Ndryshe nga disa investitorë dhe madhje dhe nga vetë zëvendësi i saj, Lagarde shtyu më shumë në kohë pritshmëritë se ishte arritur kulmi për rritjen e çmimeve.
Ajo theksoi se nuk po verifikohen komponentët apo drejtimi që do e bënin të besonte se ishte arritur kulmi i inflacionit dhe se ai do të ulet brenda një kohe të shkurtër. Në fjalën e saj në parlamentin europian, Lagarde shtoi se ekonomistët e BQE-së ende shohin rrezik të lartë për sa i përket një rekordi të ri për nivelin e inflacionit.
BQE ka rritur normën e saj për depozitat bankare me një rekord 200 pikë bazë në 1.5% në tre muaj për të ulur kërkesën, në një përpjekje për të frenuar rritjen e çmimeve.
Ekspertët kryesorë ekonomikë të BQE-së, Isabel Schnabel dhe Philip Lane, po luftojnë për perspektivën për inflacionin dhe normat e interesit, duke i lënë investitorët të shqetësuar mbi lëvizjet e ardhshme të politikës së BQE-së.
Tregjet kanë lëvizur përpara dhe mbrapa në pritje që BQE-ja të rrisë normat e saj të politikës me 50 ose 75 pikë bazë në takimin e saj të ardhshëm në 15 dhjetor. Lagarde, theksoi se duhet vazhduar me rritjen e normave të interesit pasi në të ardhmen ka ende rrugë për të bërë.
Dorina Kurtaj /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
