Kredia e biznesit për investime i është kthyer rritjes në katër muajt e parë këtij viti.
Sipas të dhënave të Bankës së Shqipërisë, për periudhën janar-prill kredia e re për investime kishte vlerën e 32.7 miliardë lekëve, në rritje me 34% krahasuar me të njëjtën periudhë të një viti më parë.
Kredia për investime është rritur paralelisht në dy segmentet e saj kryesore, atë për investim në makineri dhe pajisje dhe në pasuri të paluajtshme.
Kredia për blerjen e makinerive dhe pajisjeve kishte vlerën e 10.5 miliardë lekëve, në rritje me 48% krahasuar me të njëjtën periudhë të një viti më parë.
Ndërsa kredia e re për pasuri të paluajtshme për bizneset në katër muajt e parë të vitit arriti në 22.2 miliardë lekë, në rritje vjetore me 29%.
Në tërësi, kredia për biznesin në muajt e parë të këtij viti paraqitet në përmirësim dhe po shfaq një ecuri më të mirë krahasuar me vitin e kaluar.
Kredia e biznesit me qëllim financimin e investimeve ngelet në rritje dyshifrore, e shprehur edhe si tepricë portofoli.
Në fund të prillit, portofoli i kredisë për investime arriti në 324.8 miliardë lekë, në rritje vjetore me afërsisht 14%. Duke qenë se kredia për investime në përgjithësi ka afate më të gjata shlyerjeje dhe amortizimi, rritja e portofolit total është e qëndrueshme në kohë.
Ritmet e rritjes vjetore të kredisë për investime janë përshpejtuar krahasuar me nivelin prej 13% të fundit të vitit 2025.
Kredia për investime përbën aktualisht afërsisht 61% të vlerës totale të kredisë për bizneset, ndërsa kredia për pasuri të paluajtshme përbën rreth 42% të portofolit.
Ecuria e mirë e ekonomisë shqiptare në vitet e fundit, veçanërisht në sektorët e lidhur me pasuritë e paluajtshme dhe shërbimet turistike, kanë mbështetur edhe rritjen e investimeve të reja të bizneseve.
Në veçanti, rritja e turizmit ka rritur kërkesën për kapacitete të reja akomoduese dhe ka nxitur rritjen e investimeve në hotele. Gjithashtu, rritja e tregut të pasurive të paluajtshme dhe perceptimi pozitiv rreth zhvillimeve në këtë treg duket se ka nxitur edhe investimet për ndërtime me përdorim të natyrës tregtare apo industriale. Normat e ulëta të interesit dhe oferta e lartë e sektorit bankar për kredi kanë ndikuar gjithashtu në nxitjen e investimeve të biznesit në prona.
Gjallërimi i kredisë për biznesin, sidomos asaj për investime, po i jep shtysën kryesore rritjes së kredisë për ekonominë në pjesën e parë të këtij viti, ndërkohë që kreditimi i individëve, sidomos për blerjen e banesave paraqitet me ritme më të ngadalësuara.
Të dhënat paraprake të INSTAT treguan se vitin e kaluar ecuria e investimeve në ekonomi ishte pozitive. Formimi bruto i kapitalit fiks u rrit mesatarisht me 4.7% për katër tremujorit të vitit të kaluar, me ritme më të larta se mesatarja e rritjes ekonomike. Kredia bankare po vazhdon të mbështesë zgjerimin e investimeve në ekonomi./ E.Shehu
Burimi: Banka e Shqipërisë
Postimi ” Kredia për investime u rrit me 34% në katër muajt e parë të këtij viti ” eshte marre nga Revista Monitor.
