Presidenti i Shteteve të Bashkuara, Donald Trump, ka njoftuar se Rusia do të furnizojë tregun botëror me naftë, një lëvizje kjo që shënon një kthesë në qasjen e deritanishme për të ushtruar presion ndaj Moskës përmes goditjes së eksporteve energjetike. Trump ka deklaruar se ky vendim synon uljen e shpejtë të çmimeve rekord të karburanteve, pak javë para zgjedhjeve të mes-mandatit. Megjithatë, analistët dhe kritikët kanë vënë në dukje se kjo politikë bie ndesh me përpjekjet e mëparshme për të frenuar shitjet e energjisë ruse.
Sipas ligjit të miratuar vetëm tre javë më parë, i njohur si Akti “Lindsey O. Graham” i vitit 2026 për Sanksionimin e Rusisë dhe Iranit, presidenti ka autoritetin të vendosë tarifa deri në 100% ndaj blerësve të gazit ose naftës bruto ruse. Senatori Richard Blumenthal e cilësoi vendimin e fundit në kundërshtim të drejtpërdrejtë me qëllimin e Kongresit për sanksionet.
Përmes një postimi në rrjetin social Truth Social pas bisedimeve me presidentin rus Vladimir Putin, Trump njoftoi se “Rusia do të furnizojë menjëherë më shumë se 300,000 ton naftë, më pas edhe 500,000 ton në nëntor, të ndjekur nga 1 milion dhe 3 milionë ton, në varësi të kushteve të rafinerive”.
Menjëherë pas kësaj, Departamenti i Thesarit bëri të ditur se Zyra për Kontrollin e Pasurive të Huaja është udhëzuar të lëshojë një licencë të përkohshme për të lejuar hyrjen e naftës ruse në tregun global. Nga ana e tij, Kirill Dmitriev, i dërguari i Putin për çështje ekonomike, u shpreh se bashkëpunimi dypalësh do t'i sjellë dobi botës.
Nga ana tjetër, presidenti i Ukrainës, Volodymyr Zelensky, reagoi ashpër duke deklaruar se lehtësimi i sanksioneve amerikane ndaj Moskës i shkon plotësisht për shtat interesave ruse.
