Sektori bankar ka ulur ndjeshëm investimet në instrumente financiare të borxhit në tremujorin e parë të këtij viti.
Sipas të dhënave nga Shoqata Shqiptare e Bankave, portofoli i letrave me vlerë në bilancin e sektorit bankar në fund të marsit zbriti në 909.6 miliardë lekë. Që nga fillimi i vitit, madhësia e këtij portofoli është tkurrur me më shumë se 31 miliardë lekë, ose rreth 3.3%.
Besohet se arsyeja kryesore që ka sjellë uljen e investimeve në instrumente borxhi ka qenë forcimi i pritshmërive për rritjen e normave të interesit, në vijim të tensioneve të forta gjeopolitike në Lindjen e Mesme dhe të sinjaleve të para të rritjes së inflacionit.
Rritja e normave të interesit dhe yield-eve në tregjet financiare sjell uljen e çmimit të instrumenteve financiare të borxhit të mbajtura për shitje. Për t’i paraprirë një zhvlerësimi në vijim, disa prej bankave mund të kenë preferuar t’i shesin një pjesë të këtyre titujve, sidomos ato në valutë të huaj.
Për momentin, bankat qendrore ende nuk kanë reaguar ndaj rritjes së inflacionit me rritje të normave të interesit. Por, rritja e pritshmërive të tregjeve për një lëvizje të tillë ka sjellë tashmë rritje të treguesve benchmark në tregjet ndërkombëtare.
Treguesi kryesor benchmark për investimet në Euro, Euribori 12-mujor, aktualisht ka arirtur nivelin 2.8%, nga 2.3% që ishte në fund të muajit shkurt, kur nisi Konflikti në Lindjen e Mesme.
Nga krahasimi i të dhënave me fundin e vitit të kaluar, rezulton që pjesë më e madhe e bankave e ka ulur ekspozimin në tituj financiarë. Tkurrjen më të madhe në vlerën e portofolit të titujve e kanë regjistruar Raiffeisen Bank Albania, Banka Kombëtare Tregtare, Banka OTP Albania dhe Banka Amerikane e Investimeve.
Investimet në tituj janë zëri i dytë më i madh i aktiveve në bilancin e sistemit bankar shqiptar. Në fund të tremujorit të parë të këtij viti, portofoli i titujve financiarë përbënte 39.6% të totalit të aktiveve të sektorit bankar në vend.
Në monedhën vendase, investimet janë të përqendruara në instrumentet e borxhit të qeverisë shqiptare. Sektori bankar është financuesi kryesor i borxhit të brendshëm publik, me rreth 57% të stokut total të tij total.
Megjithatë, në vitet e fundit bankat kanë rritur ndjeshëm edhe investimet në Eurobondet e emetuara nga qeveria shqiptare në tregjet ndërkombëtare. Në fund të tremujorit të parë, portofoli i Eurobondeve të qeveria shqiptare në bilancet e sektorit bankar arriti vlerën e 106.7 miliardë lekëve ose më shumë se 1.1 miliardë euro.
Për sa i përket investimeve në titujt e emetuesve të huaj, struktura është më e larmishme, por gjithmonë e përqendruar në tituj borxhi dhe jo në ato të kapitalit.
Investimet përfshijnë letra me vlerë të qeverive dhe korporatave të huaja, si edhe investime në sipërmarrje të investimeve kolektive (fonde investimi) të huaja, zakonisht në fonde që administrohen nga palë të lidhura brenda grupeve financiare./E.Shehu
Postimi ” Pritjet për rritjen e interesave, sektori bankar uli investimet në tituj në tremujorin e parë ” eshte marre nga Revista Monitor.
