Pritjet e bizneseve dhe të agjentëve financiarë për inflacionin janë rishikuar për lart në tremujorin e parë të këtij viti.
Sipas vrojtimeve të kryera nga Banka e Shqipërisë, gjatë tremujorit të parë 2026 bizneset prisnin që inflacioni në tremujorin e parë të vitit 2027 të jetë 3.9%, me rritje 0.6 pikë përqindje në krahasim me parashikimin e tremujorit të katërt 2025. Ndërkohë, agjentët financiarë parashikojnë që inflacioni pas një viti të jetë 2.9%, rreth 0.2 pikë përqindje më lart se inflacioni i pritur në parashikimet e tremujorit IV 2025.
Pritjet e agjentëve financiarë për horizont kohor më të gjatë (pas dy dhe tre vitesh) kanë mbetur të pandryshuara krahasuar me tremujorin e katërt, në nivelin 3%.
Në të kundërt, pritjet e konsumatorëve për inflacionin u rishikuan lehtësisht për poshtë në tremujorin e parë. Megjithatë, niveli i inflacionit i pritur prej tyre mbetet i lartë, rreth nivelit 9.2%.
Konflikti në Lindjen e Mesme ka sjellë një zhvendosje për lart të pritjeve për inflacionin nga agjentët ekonomikë, i ndikuar kryesisht nga shtrenjtimi i menjëhershëm i karburanteve.
Sipas të dhënave nga INSTAT, në muajin në prill inflacioni ishte 2.8% dhe në maj arriti nivelin 3%, më i larti në dy vitet e fundit. Rritja në muajt e fundit po vjen pikërisht nga komponenti i inflacionit të importuar dhe kryesisht nga çmimet e karburanteve, që deri në tremujorin e parë kishin një kontribut negativ në inflacionin total. Nga ana tjetër, edhe përbërësit më të qëndrueshëm të inflacionit shënuan një rritje të ndjeshme në muajin prill.
Sipas informacionit të Bankës së Shqipërisë, inflacioni bazë, inflacioni bazë neto dhe inflacioni që përjashton ushqimet dhe mallrat energjetike u rritën njëkohësisht, duke treguar se presionet për rritjen e çmimeve ngelen të larta, edhe përtej efektit afatshkurtër të shtrenjtimit të naftës.
Shifrat e Bankës Qendrore tregojnë se inflacioni vjetor bazë u rrit në 2.92%, nga 2.72% që kishte qenë një muaj më parë. Inflacioni bazë ngelet gjithashtu në rritje krahasuar me të njëjtën periudhë të vitit 2025, kur shënonte nivelin 2.53%.
Inflacioni bazë përjashton produktet që nga natyra kanë luhatshmëri të lartë, si ato ushqimore dhe energjetike. Llogaritja e inflacionit bazë ka si qëllim kryesor ta zhveshë rritjen e përgjithshme të çmimeve nga luhatjet me natyrë më afatshkurtër.
Sipas analizave të Bankës së Shqipërisë, vlerat relativisht të larta të inflacionit bazë në pjesën e parë të këtij viti kanë ardhur kryesisht nga inflacioni i nëngrupit të qirave, me kontribute pozitive, ndonëse në ngadalësim, nga disa kategori shërbimesh, kryesisht të lidhura me aktivitetin e turizmit. Presionet e brendshme inflacioniste mbeten ende kontribuuesi kryesor në inflacion.
Paralelisht me inflacionin bazë, edhe inflacioni bazë neto u rrit në përmasa të ngjashme.
Për prillin, ky tregues zbriti në nivelin në 3.61%, nga 3.37% që kishte qenë në mars dhe gjithashtu në rritje nga niveli prej 2.19% i një viti më parë. Inflacioni bazë neto përjashton më tej nga inflacioni edhe nëngrupet e ushqimeve të përpunuara, përfshirë bukën dhe drithërat.
Ndërkohë, inflacioni që përjashton të gjitha produktet ushqimore dhe energjetike në prill 2026 zbriti në nivelin 3.51%, nga 3.28% që kishte qenë në mars dhe 2.12% që kishte qenë një vit më parë.
Parashikimet e skenarit bazë të Bankës së Shqipërisë sugjerojnë një rritje graduale të inflacionit drejt objektivit 3% gjatë vitit 2026, të mbështetur nga qëndrueshmëria e presioneve të brendshme inflacioniste dhe rritja e inflacionit të importuar. Megjithatë, këto parashikime shoqërohen nga pasiguri të shtuara që burojnë nga intensifikimi i presioneve si pasojë e konfliktit të Lindjes në Mesme dhe ndikimi i tij në çmimet e naftës dhe të lëndëve të tjera bazë./E.Shehu
Postimi ” Pritjet e bizneseve dhe institucioneve financiare për inflacionin u rritën në tremujorin e parë ” eshte marre nga Revista Monitor.
