Sektori i ujësjellës-kanalizimeve do të marrë 14.57 miliardë lekë mbështetje buxhetore në vitin 2027, sipas projektbuxhetit të vitit të ardhshëm. Shifra shënon një rritje të lehtë krahasuar me 14.36 miliardë lekë që ishin parashikuar për këtë vit.
Bie financimi i brendshëm
Investimet publike të financuara nga burimet e brendshme për sektorin zbresin në 10 miliardë lekë, nga 11.8 miliardë lekë të planifikuara për vitin 2026. Kjo do të thotë se fondet vendase pakësohen me 1.8 miliardë lekë.
Dyfishohen pothuajse fondet e huaja
Rënien e financimit të brendshëm e kompensojnë projektet me financim të huaj, përmes granteve dhe kredive. Për vitin 2027 ato arrijnë në 4.57 miliardë lekë, nga 2.56 miliardë lekë sivjet, duke ndikuar në rritjen e përgjithshme të fondeve për sektorin. Edhe vitin e ardhshëm, një pjesë e rëndësishme e këtyre parave vjen si grante nga donatorët ndërkombëtarë: 2.24 miliardë lekë janë grante, ndërsa 2.33 miliardë lekë janë kredi.
Projekte në vazhdim dhe të reja
Lista e detajuar e projekteve kapitale tregon se një pjesë e ndërhyrjeve janë vazhdim i punimeve të nisura vitet e fundit. Këtu përfshihen rehabilitime të rrjetit, shpime, ndërtim linjash të reja, depo, impiante pompimi, si dhe përmirësime në zonat urbane e rurale.
Për vitin 2027 janë shtuar në listë edhe një seri projektesh të reja për ujësjellës dhe kanalizime, me vlerë të planifikuar prej 3.48 miliardë lekësh.
Relacioni shoqërues i projektbuxhetit nënvizon se objektivat kryesorë të qeverisë për sektorin mbeten zgjerimi i aksesit në furnizimin me ujë të pijshëm, ulja e humbjeve në rrjet dhe rritja e orëve të furnizimit.
