Qeveria synon që në vitin 2027 furnizimi me ujë të pijshëm të arrijë mesatarisht 22 orë në ditë, ndërsa humbjet në rrjet të zbresin në 57%. Objektivat janë përcaktuar në relacionin shoqërues të projektbuxhetit për programin “Furnizimi me Ujë dhe Kanalizime”.
Në horizontin afatmesëm, dokumenti parashikon që deri në vitin 2029 furnizimi të jetë mesatarisht 24 orë në ditë, me humbje të reduktuara në 50%. Për zonat bregdetare, objektivi për vitin e ardhshëm është 21 orë furnizim në ditë, me synim rritjen në 23 orë në ditë në vitin 2029.
Hendek i thellë mes qytetit dhe fshatit
Për 2027-ën, mbulimi me shërbimin e ujit të pijshëm pritet të jetë 96% në zonat urbane dhe 70% në ato rurale, ku aksesi vazhdon të jetë dukshëm më i kufizuar. Diferenca rritet edhe më shumë te kanalizimet: objektivi i mbulimit për vitin e ardhshëm është 87% në qytete dhe vetëm 20% në fshatra. Mbulimi me impiante të trajtimit të ujërave të ndotura synohet në nivelin 20%.
Njëkohësisht, të ardhurat e shoqërive të ujësjellës-kanalizimeve parashikohet të mbulojnë 80% të kostove, çka tregon se sektori ende nuk synon mbulimin e plotë të tyre gjatë vitit të ardhshëm.
Fondet për sektorin
Mbështetja buxhetore për sektorin parashikohet në 14.57 miliardë lekë, nga 14.36 miliardë lekë të planifikuara për vitin 2026. Rritja e lehtë vjen nga shtimi i financimit të huaj, ndërkohë që fondet e brendshme për investime ulen.
Paratë do të përdoren për vijimin e punimeve për rehabilitimin e rrjeteve, ndërtimin e linjave të reja, depove dhe impianteve të pompimit. Lista e vitit 2027 përfshin gjithashtu një sërë projektesh të reja për ujësjellës dhe kanalizime, me një financim të planifikuar prej 3.48 miliardë lekësh.
