Nuk do të ketë më Zonë Ekonomike Speciale në Cala Finanza. Projekti i kompanisë Tavolara Bay për ndërtimin e një kompleksi glamping (kamping luksoz) në gadishullin bregdetar të Cala Finanza, në komunën Loiri Porto San Paolo, në verilindje të Sardenjës, ka humbur autorizimin e qeverisë italiane, shkruan Ansa.it.
Departamenti për Politikat e Jugut pranë Kryeministrisë italiane ka revokuar autorizimin e lëshuar më 6 shkurt 2026, i cili i kishte hapur rrugë realizimit të projektit.
“Vendimi për revokimin u mor pasi Këshilli Bashkiak anuloi vendimin nr. 50 të datës 25 nëntor 2025, mbi të cilin ishte mbështetur autorizimi”, deklaroi kryebashkiaku Francesco Lai.
Më 30 qershor, Këshilli Bashkiak i Loiri Porto San Paolo u mblodh me vetëm një pikë në rendin e ditës: rishikimin e vendimit të nëntorit 2025, mbi të cilin ishte mbështetur më pas autorizimi për projektin në Cala Finanza. Kryebashkiaku Francesco Lai u paraqiti këshilltarëve arsyet pse kërkonte shfuqizimin e këtij vendimi me nismë të vetë bashkisë.
Dy ditë më pas, dhe pas pjesëmarrjes masive të qytetarëve dhe grupeve të aktivistëve në protestën e zhvilluar pikërisht në Cala Finanza, nga Roma erdhi ndalimi i projektit.
Vendimi prek vetëm projektin e paraqitur zyrtarisht, atë të glampingut. Rajoni i Sardenjës ka sqaruar se nuk është depozituar asnjë kërkesë për resortin që kompania italo-braziliane Tavolara Bay Srl, pjesë e grupit JHSF, synon të ndërtojë në atë zonë.
“Është një fitore e bashkëpunimit korrekt mes institucioneve. Tregon se kur një bashki i ushtron me seriozitet dhe rigorozitet kompetencat e saj, shteti di të dëgjojë dhe të korrigjohet”, deklaroi Lai.
Edhe Francesco Spanedda, këshilltar rajonal për Pushtetin Vendor, Financat dhe Urbanistikën, tha se vendimi konfirmon qëndrimin që Rajoni ka mbajtur që në fillim.
“Çështja nuk ishte të ishe pro apo kundër investimeve, por respektimi i rregullave dhe kompetencave institucionale. Planifikimi urbanistik nuk është një formalitet dhe procedurat e jashtëzakonshme nuk mund të kthehen në rrugë të shkurtra”, u shpreh ai.
Nuk kanë munguar as kritikat ndaj qeverisjes rajonale. Këshilltarja rajonale e Fratelli d’Italia, Cristina Usai, akuzoi shumicën se po përpiqet të rishkruajë historinë e Cala Finanza-s.
“Fillimisht miratojnë akte politike që ndryshojnë kuadrin urbanistik, pastaj, kur qytetarët rebelohen dhe çështja shpërthen, përpiqen t’ia faturojnë të gjithë përgjegjësinë qeverisë qendrore”, deklaroi ajo.
Mega-projekti në Sardenjë, debate për aksionerët dhe klauzolën e “kontributit qeveritar”
Postimi ” Projekti i kampingut luksoz në Sardenja, qeveria italiane i heq statusin special, pas protestave ” eshte marre nga Revista Monitor.
