14.5 C
Tirana
E premte, 1 Mars 2024

Pushimet ditore po bëhen të papërballueshme, çmimet në plazhet e Lalëzit, rritje vjetore me 60%

Duhen Lexuar

Plazhet në zonën e Gjirit të Lalëzit prej vitesh janë shndërruar në oazin e pushuesve ditorë të banorëve të kryeqytetit.

Me infrastrukturë të dedikuar kryesisht për familje mesatare dhe nën këtë nivel, këtë sezon ato janë bërë të papërballueshme.

Përveç naftës, çmimet e çadrave dhe shërbimeve të tjera janë rritur së paku me 60% këtë sezon.

Shpenzimet ditore për një person që udhëton nga Tirana me automjetin e tij në një nga plazhet më të lira të Shën Pjetrit në zonën e Gjirit të Lalëzit arrijnë 3500 lekë nga 2100 lekë vitin e kaluar, nëse merren në konsideratë shpenzimet minimale (karburanti, çadra, një kafe + ujë).

Për të përshkuar pak më shumë se 80 kilometra nga Tiranë në Lalëz (vajtje+ardhje) makinës mesatare i duhen rreth 2500 lekë karburant nga rreth 1500 lekë një vit më parë. Shpenzimet për naftën janë rritur së paku me 66% në krahasim me vitin e kaluar.

Çmimi i një çadre është rritur me 60%, në 800 lekë në rastin më të mirë nga 500 lekë që ishte vitin e kaluar. Gjithashtu, çmimet janë rritur edhe në bare dhe restorante. Një kafe e shoqëruar me ujë kushton së paku 30% më shtrenjtë se vitin e kaluar.

Kostot e larta të plazheve popullore që frekuentohen nga shtresa mesatare e kryeqytetit, po i kthejnë ata në plazhe “luksi”. Për shkak të çmimeve të larta, frekuentimi i tyre është ulur ndjeshëm.

Administratorët e plazheve pohuan se numri i frekuentuesve në fundjavë ka rënë së paku me 50%, duke i çliruar ata që kanë mundësi të përballojnë kostot, prej trafikut dhe mbipopullimit. Por, sipas tyre, rritja ishte e pashmangshme prej rritjes së qirave, lëndëve të para etj.

Popullsia me të ardhura nën mesataren dhe shtresa e pensionistëve e ka të vështirë të përballojë kostot e pushimeve ditore këtë vit.

Sezoni turistik këtë vit ka nisur më shpejt se vitet e tjera për shkak të kohës së favorshme. Pavarësisht çmimeve më të larta, shtetasit e huaj që zgjedhin Shqipërinë për fundjavë apo për pushime po rritet.

Sipas të dhënave të INSTAT, numri i shtetasve të huaj që hynë në Shqipëri gjatë pesëmujorit të parë ishte mbi 1.6 milionë, me rritje vjetore mbi 54%.

Heqja e masave kufizuese për udhëtimet pas pandemisë nga shumica e vendeve ka çuar në rritje të udhëtarëve. Me gjasë të këtë sezon do të bëhen pushimet e munguara. Por për një pjesë të popullsisë me nivel të ulët ekonomik, plazhet dhe strukturat hoteliere po bëhen të pakapshme. 

Burimi:Monitor
- Reklama -
spot_img
- Reklama -

Artikujt e Fundit