Qeveria po përgatit standardizimin e procedurave për njohjen e kualifikimeve profesionale të fituara jashtë vendit, si pjesë e Planit Kombëtar të Veprimit për profesionet e rregulluara.
Sipas relacionit të projektvendimit, një nga objektivat është “vendosja e procedurave të standardizuara për njohjen e kualifikimeve të huaja, për ofrimin e përkohshëm dhe rastësor të shërbimeve, si dhe për kontrollin paraprak në rastet e justifikuara nga interesi publik”.
Plani lidhet me projektligjin “Për njohjen e kualifikimeve profesionale të fituara në shtetet anëtare të Bashkimit Evropian, Zonës Ekonomike Evropiane dhe Konfederatës së Zvicrës”.
Dokumenti thotë se plani do të shërbejë si “instrument zbatues dhe koordinues i kuadrit të ri ligjor”, duke synuar zbatimin e unifikuar të detyrimeve në sektorët e përfshirë.
Masat përfshijnë edhe identifikimin e profesioneve të rregulluara, përcaktimin e aktiviteteve të rezervuara dhe titujve të mbrojtur, si dhe vlerësimin e proporcionalitetit të kërkesave për hyrjen dhe ushtrimin e secilit profesion.
Qeveria synon gjithashtu krijimin dhe konsolidimin e një baze kombëtare elektronike të profesioneve të rregulluara, e cila do të shërbejë si pikë e vetme informacioni për qytetarët, profesionistët dhe institucionet.
Plani parashikon që lista kombëtare e profesioneve të rregulluara të miratohet, t’i dërgohet Komisionit Evropian, të publikohet dhe të përditësohet rregullisht.
Sipas dokumentit, lista përfshin 323 profesione të rregulluara, të shpërndara në 11 autoritete rregullatore qendrore.
Faza e parë e zbatimit, që lidhet me përafrimin rregullator, është planifikuar për vitet 2026-2027, ndërsa konsolidimi i databazës dhe lidhja e saj me sistemet rajonale dhe të Bashkimit Evropian parashikohet për periudhën 2028-2030./ N.Maho
Postimi ” Qeveria synon të standardizojë njohjen e kualifikimeve profesionale të huaja ” eshte marre nga Revista Monitor.
