Guvernatori i Bankës së Shqipërisë, Gent Sejko pohoi se rritja e çmimeve të naftës dhe të energjisë në tregjet botërore mund të ndikojë në nivelet e inflacionit dhe ritmit të rritjes ekonomike në vend, ndonëse këto efekte mund të jenë kalimtare.
Guvernatori e bëri këtë deklaratë në një takim me përfaqësues të Bankës Botërore (BB) dhe Korporatës Financiare Ndërkombëtare (IFC) kryesuar nga z. Massimiliano Paolucci, Përfaqësues rezident i BB-së në Shqipëri, dhe zj. Laureta Qorlazja, Përfaqësuese e IFC-së.
Në hapje të takimit, Guvernatori Sejko i përcolli përfaqësuesve të BB-së dhe IFC-së një falënderim të veçantë për asistencën teknike të ofruar ndër vite për Bankën e Shqipërisë, kryesisht në fushat e mbikëqyrjes bankare, sistemeve të pagesave dhe edukimit financiar.
Në vijim, Guvernatori Sejko prezantoi panoramën ekonomike të vendit, duke u shprehur se ekonomia shqiptare dhe treguesit kryesorë të stabilitetit ekonomik, monetar e financiar të saj janë në një trend pozitiv zhvillimi.
Guvernatori u shpreh se, ndonëse pasiguria në kontekstin botëror mbetet e lartë, vendimet lidhur me politikën monetare kushtëzohen nga informacionet e reja dhe do të jenë gjithnjë në përputhje me objektivin e stabilitetit të çmimeve. Në këtë kontekst, ai shtoi se rritja e çmimeve të naftës dhe të energjisë në tregjet botërore mund të ndikojë në nivelet e inflacionit dhe ritmit të rritjes ekonomike në vend. Megjithatë, efektet e goditjes pritet të jenë kalimtare dhe të mos lënë gjurmë afatgjata në trendet e zhvillimit të vendit.
Nga ana e tij, z. Paolucci vlerësoi politikën monetare të ndjekur nga Banka e Shqipërisë, duke e konsideruar atë një kontribut të rëndësishëm në ecurinë pozitive të ekonomisë së vendit. Ai shprehu vlerësimet për Bankën e Shqipërisë lidhur me menaxhimin e raportit të kredive me probleme, i cili ka shënuar nivelet minimale të më shumë se një dekade, duke rënë nga 25% në vitin 2014, në 3.8% në 2026.
Një tjetër çështje e trajtuar gjatë takimit ishte dhe modernizimi i sistemeve të pagesave në Shqipëri, si një hap i rëndësishëm drejt forcimit të integrimit financiar të vendit me tregun evropian.
Guvernatori u shpreh se Banka e Shqipërisë, me asistencën e Bankës Botërore, ka ndërmarrë hapa konkretë për harmonizimin e kuadrit rregullator me standardet evropiane, duke mundësuar anëtarësimin me sukses në Tregun Unik të Pagesave në Euro (SEPA).
Ai solli në vëmendje edhe bashkëpunimin e ngushtë me Bankën Botërore në kuadër të projektit TIPS Clone, si dhe për të implementuar një sistem pagesash të shpejta (Instant Payment), i cili synon të ofrojë pagesa në kohë reale, me një siguri më të lartë dhe kosto më të ulët për qytetarët.
Në vijim të takimit, palët diskutuan lidhur me mbështetjen që IFC ka dhënë për Bankën e Shqipërisë për forcimin e kuadrit rregullator, mbikëqyrës dhe infrastrukturës së të dhënave financiare nëpërmjet projekteve që lidhen me Digital Finance, Open Banking dhe Regjistrin e Kredive. Në këto drejtime, IFC ka kryer një sërë analizash e hartuar rekomandime, si dhe ka zhvilluar në vazhdimësi trajnime online për stafin e Bankës së Shqipërisë dhe bankat qendrore të rajonit.
Palët ranë dakord që të vijohet më tej me përpjekjet që Banka e Shqipërisë i ka kushtuar përmirësimit të kuadrit rregullativ të sistemit financiar. Përfaqësuesit e BB-së dhe IFC-së rikonfirmuan gatishmërinë e tyre për të vijuar ofrimin e asistencës teknike në këto drejtime.
Postimi ” Sejko me BB: Nafta do ndikojë te çmimet dhe rritja ekonomike ” eshte marre nga Revista Monitor.
