Bizneset ulën huamarrjen jashtë vendit gjatë vitit të kaluar. Të dhënat e Bankës së Shqipërisë tregojnë se borxhi i jashtëm i sektorit privat arriti në fund të vitit 2025 zbriti në 1.49 miliardë euro, në rënie me 3.3% krahasuar me një vit më parë.
Statistikat tregojnë se rënia e detyrimeve të sektorit privat jashtë vendit ka ardhur kryesisht nga tkurrja e vlerës së stokut të kredive afatgjata nga huadhënës jorezidentë.
Huatë përbëjnë edhe pjesën më të madhe të detyrimeve të kompanive private jashtë vendit, me rreth 85% të totalit. Pjesa e mbetur konsiston kryesisht në tituj financiarë borxhi.
Huamarrja e bizneseve shqiptare jashtë vendit ka tipologji të ndryshme, duke filluar nga kreditë tregtare, kreditë e siguruara nga institucionet e zhvillimit, apo shitja e obligacioneve te subjekte të huaja.
Duke qenë se Shqipëria është një vend me prani të konsiderueshme të investitorëve të huaj, në disa raste këto kompani sigurojnë hua nga institucione financiare në vendet e tyre të origjinës.
Një burim tjetër shumë i rëndësishëm janë edhe huatë që shumë ndërmarrje përfitojnë nga kompanitë mëmë jashtë vendit. Ky segment i detyrimeve të jashtme në fakt është edhe më i madh, me një vlerë totale prej 1.63 miliardë eurove.
Edhe vlera e këtyre detyrimeve ka pësuar rënie krahasuar me një vit më parë, me 1.3% më pak.
Në total, borxhi i jashtëm i bizneseve shqiptare ngelet në vlera ndjeshëm më të ulëta krahasuar me huatë e siguruara brenda vendit dhe kryesisht kreditë bankare.
Sipas të dhënave të Bankës së Shqipërisë, në fund të vitit 2025 portofoli i kredisë bankare të biznesit kishte vlerën e 516 miliardë lekëve ose rreth 5.3 miliardë eurove.
Një peshë në rritje po fiton gjithashtu huamarrja e brendshme nëpërmjet emetimit të obligacioneve. Sipas të dhënave të Autoritetit të Mbikëqyrjes Financiare (AMF), portofoli i obligacioneve me ofertë private, i llogaritur si vlera e emetuar dhe ende e pashlyer, arriti në 39.1 miliardë lekë ose gati 404 milionë euro.
Në pjesën dërrmuese, këto obligacione janë të financuara nga investitorë privatë brenda vendit. Vetëm për vitin e kaluar, vlera e portofolit të obligacioneve është rritur me 38%./ E.Shehu
Burimi: Banka e Shqipërisë
Postimi ” Ulet borxhi i jashtëm i bizneseve shqiptare ” eshte marre nga Revista Monitor.
