Viti 2023 ka vijuar trajektoren pozitive të të ardhurave buxhetore, të cilat rezultojnë sipas Ministrisë së Financave 700 milionë euro më shumë se një vit më parë. Ajo ka bërë një përmbledhje paraprake të treguesve buxhetorë për vitin që sapo lamë pas, nga e cila rezulton se të ardhurat totale për të 12 muajt u realizuan në masën 643.4 miliardë Lekë ose 100.1% e planit fillestar të buxhetit. Krahasuar me një vit më parë të ardhurat janë rritur me +70.6 miliardë lekë ose +12.3% më shumë, ose afërsisht 700 milionë euro.
Të ardhurat e arkëtuara nga Drejtoria e Përgjithshme e Tatimeve dhe Drejtoria e Përgjithshme e Doganave (përfshirë edhe Kontributet e mbledhura nga DPT), u vlerësuan në masën 561.7 miliardë lekë, 52.3 miliardë ose 10.3% më shumë, krahasuar me të njëjtën periudhë të vitit 2022.
Rritje të fortë kanë shënuar edhe shpenzimet buxhetore, megjithëse jo me ritmin e të ardhurave. Ministria raporton në analizën paraprake të treguesve se shpenzimet e përgjithshme publike për vitin 2023, arritën në rreth 674.7 miliardë lekë me një realizim në masën 96.6 përqind të planit vjetor sipas Buxhetit Fillestar. Krahasuar me vitin 2022 shpenzimet e përgjithshme publike rezultojnë 3.6 përqind më të larta ose 23.7 miliardë lekë më shumë.
Një raport i tillë mes të ardhurave dhe shpenzimeve ka sjellë për pasojë një nivel mjaft të ulët të deficitit buxhetor, i cili për vitin 2023 rezultoi në masën 1.4% të PBB-së, krahasuar me 3.7% të PBB-së që ishte në vitin 2022. Ky nivel deficiti buxhetor është më i ulëti i të gjitha kohërave.
Por, nga ana tjetër, rritja e të ardhurave ka përmirësuar edhe treguesit e borxhit publik, i cili rezulton në nivelin 59.2% te GDP-se, niveli me i ulet qe nga viti 2008.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
