10.5 C
Tirana
E shtunë, 24 Shkurt 2024

5 zakone të rëndësishme të liderëve të mëdhenj

Liderët e mëdhenj ndërmarrin veprime për të qenë më efektivë në rolet e tyre drejtuese dhe për të ngjallur besim tek ekipi i tyre.

Duhen Lexuar

Një lider i madh nuk është i tillë sepse drejton kompaninë e tij apo një departament. Një lider nuk mund të konsiderohet i madh, edhe pse mund të ketë shkëlqyer në industrinë e tij që në fillimet e karrierës, ose sepse mund të ketë punësuar një ekip që plotëson të gjitha nevojat e biznesit. Të gjitha këto ndihmojnë, pa dyshim, por këto gjëra thjesht e bëjnë dikë të jetë lider. Cilët janë ato elementë që e bëjnë një lider të jetë i madh?

  1. Liderët e mëdhenj punojnë për të përmirësuar inteligjencën e tyre emocionale

Harrojeni koeficientin e inteligjencës, IQ – gjithҫka ka të bëjë me inteligjencën emocionale, EI, kur bëhet fjalë për një lider të fortë. Inteligjenca emocionale është aftësia për të njohur dhe kuptuar emocionet e vetes tuaj dhe të të tjerëve. Njerëzit e përdorin këtë për të menaxhuar sjelljen dhe komunikimin e tyre.

Në botën e sotme, aftësitë e lidershipit duhen zhvilluar nëpërmjet praktikës dhe ndërgjegjësimit të qëllimshëm. Liderët më të mirë mes nesh shpenzojnë kohë për të investuar në emocionet e tyre dhe të të tjerëve. Kjo do të thotë të analizosh arsyet pse punonjësit janë duke vepruar ose duke u përgjigjur në mënyra të ndryshme – dhe të kuptosh arsyet e këtyre sjelljeve.

Kjo do të thotë gjithashtu se këta liderë ndjekin moton “përgjigju, mos reago” kur bëhet fjalë për marrjen e vendimeve në biznes. Ata e dinë se përgjigjet automatike emocionale ndaj situatave sfiduese nuk do të sjellin rezultatet më të mira. Në vend të kësaj, ata do të marrin në konsideratë të gjitha informacionet në një situatë – si dhe nevojat dhe dëshirat e njerëzve – e më pas do të përgjigjen në kohën e duhur. Vendimet e tyre nuk janë emocionale.

  1. I pranojnë hapur gabimet

Gabimet na ndodhin të gjithëve dhe një gabim nuk është një shenjë e lidershipit të dobët.

Kur një lider bën një gabim, gjëja më e keqe që mund të bëjë më pas është ta injorojë atë ose të pretendojë se ai gabim nuk ka ndodhur. Kjo i dërgon një mesazh ekipit se liderit ose nuk i intereson ajo që ka ndodhur, ose është plotësisht i pavetëdijshëm për ҫfarë ka ndodhur, ose atij i intereson më shumë të duket mirë sesa të marrë përgjegjësinë që i takon. Në këtë mënyrë, punonjësit do të humbasin besimin tek ai lider – dhe si përfundim, do të humbasin edhe respektin.

Një lider i madh do të bëjë të kundërtën. Ai do të vlerësojë dhe analizojë atë që ka ndodhur. Ai do të pranojë çdo gabim apo gafë që ka bërë dhe fokusi i tij kryesor do të jetë të kuptojë se çfarë ka ndodhur, çfarë mund të mësojë nga kjo përvojë dhe si mund ta shmangë atë në të ardhmen.

Në fakt, duke mësuar nga gabimet, liderët kanë mundësinë të krijojnë një ekip punonjësish më të mirë.

  1. Kanë komunikim shumë të mirë

Punonjësit natyrshëm presin nga lideri një vizion, një drejtim dhe qartësi. Nëse një drejtues nuk mund të komunikojë mirë, performanca e punonjësve dhe kuptimi i tyre për vlerat e kompanisë do të dobësohen. Në fund, biznesi do ta pësojë.

Një pjesë e madhe e komunikimit efektiv është dëgjimi aktiv. Kur dikush po flet me të, një lider i madh do të jetë i përqendruar tek ajo që po thuhet. Ai do të bëjë pyetje dhe do të marrë parasysh këndvështrimin e personit tjetër. Vetëm se dikush është drejtues, kjo nuk do të thotë se ka gjithmonë të drejtë.

  1. Kanë “sistemin” e tyre të ruajtjes së qetësisë në një krizë

Pa dyshim, gjërat në punë mund të shkojnë edhe keq, madje në shumicën e rasteve kjo është e pashmangshme. Një lider i mirë zhvillon “sistemin” e tij personal për t’u përballur me këto situata dhe për t’i trajtuar ato me qetësi. Ky sistem është i ndryshëm nga njëri lider te tjetri, në varësi të preferencave të tyre.

Kur lindin probleme, ata do të kërkojnë këtë “sistem” të dedikuar, në mënyrë që ta rikthejnë veten e tyre te gjërat që kanë vërtet rëndësi, si dhe për të marrë vendimin se si do të ecet përpara në mënyrë konstruktive. Teknikat e ndërgjegjësimit shpesh do të jenë pjesë e këtij “sistemi” që liderat zhvillojnë, duke u përqendruar në të tashmen, në vend se të shqetësohen për të shkuarën apo për të ardhmen e pashmangshme.

  1. Ata bëjnë plane – shumë plane.

Siç ka thënë Benjamin Franklin, “Nëse dështon të planifikosh, po planifikon të dështosh”.

Liderët e mëdhenj e dinë mjaft mirë këtë dhe nuk do të rrezikonin kurrë mundësitë e tyre të suksesit duke injoruar nevojën për të bërë plane. Kjo do të thotë se ata planifikojnë dhe organizojnë në mënyrë proaktive strategjitë përpara se të marrin vendime dhe t’i zbatojnë ato.

Përveç planifikimit për ngjarje të shënuara, ata janë gjithashtu në gjendje të bëjnë një hap prapa nga detyrat e përditshme, për t’u siguruar që në terma të përgjithshëm, biznesi po shkon në drejtimin e duhur për të pasur rritje dhe sukses. Nëse kjo nuk po ndodh, ata kanë mundësinë të punojnë për ndryshime domethënëse në mënyrë që të marrin rezultatin e dëshiruar. 

- Reklama -
spot_img
- Reklama -

Artikujt e Fundit