Agjencia e Ushqimit dhe Veterinarisë (AUV) në Kosovë ka asgjësuar 21,226 kilogramë produkte mishi, të tërhequra nga tregu nga operatori ekonomik ELKOS SH.P.K. Sipas institucionit, asgjësimi u krye në zbatim të një urdhërese të Inspektoratit Veterinar të Agjencisë, në kuadër të të cilës kompania ka vijuar procesin e gjurmueshmërisë dhe tërheqjes së produkteve ushqimore.

“Si rezultat, operatori ka tërhequr edhe 21,226 kg produkte ushqimore, të cilat janë asgjësuar më 30 tetor 2026, nën mbikëqyrjen e inspektorëve të AUV-së”, thuhet në njoftimin e Agjencisë.

Çfarë përfshijnë produktet e asgjësuara

Bazuar në evidencën e vetë operatorit, sasia e tërhequr përbëhet nga mushkëri dhe kofshë pule, mish pule, mish i grirë, mish gjedhi dhe produkte të tjera të mishit, si edhe artikuj të tjerë ushqimorë.

Kjo masë vjen si vazhdim i urdhrit fillestar të AUV-së, me të cilin u ndalua shitja dhe u vendos tërheqja nga tregu dhe asgjësimi i 3,130 kilogramëve kofshë pule të ngrira, pasi në to u konstatua prania e mykut.

Agjencia bën të ditur se kontrollet nuk kanë përfunduar:

“Procesi i gjurmueshmërisë dhe grumbullimit të sasive të tjera po vazhdon, veçanërisht për produktet tek të cilat janë konstatuar ndryshime të cilësive organoleptike, përfshirë praninë e mykut. Produktet e identifikuara si të papërshtatshme për konsum do t’u nënshtrohen masave përkatëse të ndalimit të shitjes, tërheqjes dhe asgjësimit”.

Salmonella në mishin e pulës nga Brazili

Të premten, AUV ndaloi shitjen dhe urdhëroi tërheqjen e mishit të ngrirë të pulës, të importuar nga Brazili nga kompania “Apetit”, pasi në të u gjet bakteri “Salmonella Minnesota”. Sipas njoftimit të Agjencisë, masa e ndalimit dhe tërheqjes prek dy lote të produktit.

5.56 tonë misër me Aflatoksinë B1

Një ditë më parë, Agjencia asgjësoi edhe 5.56 tonë misër me origjinë nga Serbia, për shkak se përmbajtja e Aflatoksinës B1 i tejkalonte kufijtë e lejuar. Masat u zbatuan ndaj tri subjekteve ekonomike:

  • Agro Com Sh.P.K. në Fushë Kosovë, ku u asgjësuan 3,270 kg misër;
  • Thermo-1 Sh.P.K. në Prugoc të Prishtinës, ku u asgjësuan 1,040 kg;
  • NTP “Te Hysi” në Shtime, ku u asgjësuan 1,250 kg.

Aflatoksina B1 (AFB1) është toksinë që prodhohet nga disa lloje myqesh dhe mund të kontaminojë drithërat, sidomos misrin. Ekspozimi afatgjatë ndaj saj mund të dëmtojë mëlçinë dhe të rrisë rrezikun e kancerit. Kur kafshët ushqehen me ushqim të kontaminuar, toksina mund të shndërrohet në Aflatoksinë M1 dhe të kalojë në qumësht, duke përbërë rrezik potencial për shëndetin e konsumatorëve.

Në këtë kontekst, AUV u ka bërë thirrje fermerëve, prodhuesve dhe tregtarëve të ushqimit për kafshë që të garantojnë origjinën dhe gjurmueshmërinë e produkteve, të respektojnë kushtet e duhura të ruajtjes dhe të mos përdorin apo tregtojnë misër për të cilin është konstatuar tejkalim i kufijve të lejuar të Aflatoksinës B1.