Autoritetet finlandeze kanë urdhëruar ndalimin e punimeve për ndërtimin e dy qendrave të planifikuara të të dhënave të Google, për shkak të shqetësimeve që lidhen me shpyllëzimin e më shumë se 300 hektarëve pyje. Projektet janë pjesë e investimit rekord prej 13 miliardë eurosh të Google në Finlandë, i cili u njoftua më pak se një muaj më parë dhe u përshkrua nga kompania si investimi i saj më i madh i vetëm në Europë.

Agjencia Finlandeze e Mbikëqyrjes tha se punimet në njërin prej vendeve kishin qenë kryer pa vlerësimin e detyrueshëm të ndikimit në mjedis dhe urdhëroi që masat që do të ndryshonin ndjeshëm mjedisin të pezulloheshin deri më 23 tetor. Google deklaroi se në këtë rast nuk i kishin përmbushur standardet e larta dhe se do të ndiqnin udhëzimet e agjencisë. Urdhrat lidhen me punimet përgatitore të kryera në vendet ku janë planifikuar qendrat e të dhënave në Muhos dhe Kajaani.

Sipas Tommi Muilu, drejtues i sektorit të mjedisit në agjenci, punimet në këto zona përfshinin prerjen e pemëve dhe heqjen e shtresës sipërfaqësore të tokës, ndërtimin e rrugëve brenda kantierit dhe zonave të magazinimit, si dhe ndryshime në kanalet kulluese. Tuike Finland, kompania që qëndron pas projekteve të qendrave të të dhënave të Google, është urdhëruar të japë shpjegime dhe të paraqesë mënyrën se si synon të vijojë më tej deri më 14 tetor. Agjencia tha se mund të nisë procedurat e zbatimit të detyrueshëm nëse kompania nuk përmbush kërkesat e saj.

Hanna Halmeenpaa, kryetare e Shoqatës Finlandeze për Ruajtjen e Natyrës, kishte deklaruar më herët se ishin prerë pyje në zona natyrore që duhet të ruheshin. Organizata për mbrojtjen e natyrës kishte kërkuar më parë ndalimin e punimeve deri në shqyrtimin e kërkesave mjedisore.

Në një deklaratë, Google tha: I kuptojmë shqetësimet dhe, në këtë rast, nuk i kemi përmbushur standardet tona të larta. Kompania shtoi se kishte vepruar në mirëbesim në bazë të Ligjit për Pyjet, kishte kryer studime të natyrës dhe kishte marrë masa për mbrojtjen e zonave me vlerë të lartë mjedisore, duke shtuar se po çojnë përpara planet për peizazhin dhe biodiversitetin, që përfshijnë mbjelljen e pemëve në një sipërfaqe prej 130 hektarësh në Muhos.

Google njoftoi muajin e kaluar se do të investojë të paktën 13 miliardë euro në Finlandë gjatë viteve 2027 dhe 2028. Planet e kompanisë përfshijnë qendra të reja të të dhënave në Kajaani, Muhos dhe Vaala, krahas investimeve në qendrën ekzistuese në Hamina, për të përballuar kërkesën në rritje për shërbime si Search, Maps dhe Inteligjencën Artificiale, Gemini. Kompania deklaroi se faza e ndërtimit do të mbështesë më shumë se 37 mijë vende pune dhe do të kontribuojë mesatarisht me 3.6 miliardë euro në vit në ekonominë e Finlandës. Si pjesë e zgjerimit, Google nënshkroi gjithashtu një marrëveshje 22-vjeçare për blerjen e energjisë elektrike me kompaninë finlandeze Fortum, që mbulon deri në gjysmën e kapacitetit të centralit bërthamor Loviisa, i cili do të ndihmojë në funksionimin e centralit deri në vitin 2050.