Furnizuesi i Tregut të Lirë, që është një nga kompanitë e OSHEE Group do të mund të depozitojë pranë Korporatës Elektorenergjetike Shqiptare energjinë e blerë në rast të tepricave.
Këshilli i Ministrave ka miratuar disa ndryshime në vendimin që përcakton kushtet e detyrimit të shërbimit publik, që zbatohen për të licencuarit në sektorin e energjisë elektrike, duke speciafikuar se qëllimi është optimizimi i portofolit të 2 shoqërive publike, që janë FTL dhe KESH.
Paralelisht, FTL mund të depozitojë pranë KESH edhe sasinë e tepërt nga prodhimi i burimeve të rinovueshme të energjisë, pas mbulimit të humbjeve të Operatorit të Sistemit të Shpërndarjes apo furnizimit të klientëve në tregun e lirë. Kjo energji mund të përdoret për nevoja të furnizimit të klientëve universalë.
Gjithashtu, vendimi i ri përcakton se në rast të tepricave, sasitë e planifikuara për blerje në treg të parregulluar nga Furnizuesi i Tregut të Lirë duhet të jenë jo më shumë se pesëdhjetë për qind e energjisë elektrike mujore të planifikuar për furnizim, duke i mundësuar Furnizuesit të Tregut të Lirë depozitimin dhe rimarrjen potenciale të tyre.
Kjo skemë depozitimi e energjisë aplikohet për të herë të parë në vendin tonë.
Ola Mitre/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
