Gjashtë banka në Shqipëri kanë vendosur të mbyllin përkohësisht një pjesë të degëve të tyre, pasi disa degë bankash dhe institucionesh financiare jobanka u dogjën gjatë protestës studentore të ditës së djeshme. Raiffeisen, OTP, Tirana Bank, Union Bank, Intesa Sanpaolo dhe ProCredit Bank theksojnë se siguria e punonjësve dhe e klientëve është prioritet kombëtar, ndaj shërbimet do të ofrohen përmes kanaleve digjitale.

Bankat bëjnë të ditur se po ndjekin nga afër zhvillimet e fundit dhe po punojnë për të siguruar vazhdimësinë e shërbimeve bankare pa ndërprerje dhe në kushte të plota sigurie. Për çdo ndryshim që mund të ndikojë në ofrimin e shërbimeve, qytetarët do të njoftohen nëpërmjet kanaleve zyrtare, ndërsa individët dhe bizneset ftohen të përdorin aplikacionet për nevojat e tyre bankare.

Degët që nuk do të funksionojnë

  • Raiffeisen Bank: sot mbyllen degët në Rrugën e Kavajës, në Bllokun e Ambasadave, tek ETC, Zogu I, dega 21 Dhjetori, dega Kamëz, Zogu i Zi, Abdyl Frashëri, Vila Gold, dega Durrës dhe Cashless Durrës.

  • Intesa Sanpaolo Bank: degët te Piramida, Rruga e Durrësit, e Elbasanit, e Kavajës dhe Stacioni i Trenit qëndrojnë të mbyllura deri në një njoftim të dytë.

  • OTP Bank: degët te Kullat Binjake, Bulevardi Zogu I dhe Karl Topia mbyllen përkohësisht deri në njoftim të dytë.

  • Union Bank: dega te Toptani nuk do të ofrojë shërbime gjatë ditës së sotme.

  • ProCredit Bank: dega te Zogu I nuk do të ofrojë shërbime sot.