Nga viti 2018, kur edhe nisi të japë vendimet e para për shkarkimin apo konfirimin në detyrë, Komisioni i Pavarur i Kuaalifikimit, shkalla e parë e Vetting-u, praktikisht ka përgjysmuar numrin e gjyqtarëve e prokurorëve në sistemin e drejtësisë. Sipas të dhënave zyrtare të Komisionit, nga data 8 shkurt 2018 deri në datën 30 nëntor 2022 ai ka dhënë 587 vendime. Në total numri i vendimeve për konfirmim në detyrë është më i lartë se ai i shkarkimeve, në një kohë që numri i të larguarve është shumë më i madh për shkak të dorëheqjeve. Një pjesë e mirë e dorëheqjeve janë dhënë pasi procesi i rivlerësimit ka hyrë në fazë të avancuar, madje në disa janë ato janë dhënë edhe pas seancës së parë dëgjimore, në prag të dhënies së vendimit.
Më specifikisht, bëhet fjalë për 235 vendime për konfirmimin në detyrë të 118 gjyqtarëve, 104 prokurorëve, 2 ish-inspektorëve në KLD, 1 inspektori në KLGJ dhe 10 ndihmësve/këshilltarë ligjorë.
Sa i përket largimeve nga sistemi, janë dhënë 214 vendime për shkarkimin nga detyra të 127 gjyqtarëve, 83 prokurorëve, 1 inspektori në ILD, 1 inspektori në KLGJ dhe 2 ndihmësve ligjorë.
Në 88 raste Komisionit të Pavarur të Kualifikimit i është dashur të ndërpresë procesin për 55 gjyqtarë, 21 prokurorë, 2 ishinspektorëve në KLD dhe 9 ndihmësve ligjorë + 1 ish-prokurori (Neni G I Aneksit të Kushtetutës). Bëhet fjalë pikërisht për rastin e dorëheqjes, kur Komisioni i Pavarur i Kualififikimit është i detyruar të ndërperesë menjëherë procesin e rivlerësimit. Në 8 raste kemi të bëjmë me pushim procesi, ndërsa janë dhënë 38 vendime për përfundimin e procesit pa një vendim përfundimtar.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
