Tregjet e aksioneve në Europë e filluan seancën e së martës me humbje, nën peshën e rezultateve më të dobëta se pritej të HSBC dhe të tensioneve sociale në rritje në Francë, ekonomia e dytë më e madhe e Eurozonës. Në orët e para të tregtimit, indeksi paneuropian STOXX 600 zbriti me 0.2%, në 639.64 pikë, duke fshirë një pjesë të rimëkëmbjes së ditës së mëparshme, kur kishte shënuar një rritje prej gati 0.8%.

HSBC tërheq poshtë sektorin bankar

Aksionet e HSBC, banka më e madhe në Europë, ranë me 6.9% pasi të ardhurat e raportuara nuk arritën pritshmëritë e analistëve. Një nga faktorët kryesorë ishte ngadalësimi i aktivitetit në segmentin e administrimit të pasurisë. Rënia e kredidhënësit britanik u përhap në të gjithë sektorin, ku indeksi i bankave europiane humbi 1.3%.

Protestat në Francë shtojnë pasigurinë

Investitorët vijojnë të ndjekin me shqetësim situatën në Francë, ku organizatorët e protestave studentore kanë deklaruar se demonstratat do të vazhdojnë, edhe pse qeveria ka bërë lëshime në fushën e arsimit. Lëvizja po fiton mbështetjen e një numri gjithnjë e më të madh sindikatash dhe grupesh të tjera, gjë që po e zgjeron ndikimin ekonomik të trazirave. Gjatë javës së kaluar, aksionet franceze kishin rënë me më shumë se 2%, ndërsa protestat dhe pasiguria politike dobësuan besimin e tregut.

Borxhi publik pranë 120% të PBB-së

Një tjetër burim presioni janë financat publike të Francës. Borxhi publik po i afrohet nivelit prej 120% të Prodhimit të Brendshëm Bruto, ndërsa nevojat e mëdha për huamarrje e bëjnë më të vështirë hartimin e buxhetit për vitin e ardhshëm. Shitjet në tregun e obligacioneve franceze kanë zgjeruar diferencën e yield-eve kundrejt titujve gjermanë, duke e ngjitur primin e rrezikut për borxhin francez në nivele që nuk ishin parë që nga kriza e borxheve sovrane europiane e vitit 2011.

Pasojat ndihen edhe në tregtinë me pakicë. Shumë dyqane kanë mbetur të mbyllura për arsye sigurie, ndërsa bizneset raportojnë rënie të ndjeshme të shitjeve.

Novartis në drejtim të kundërt

Ndryshe nga bankat, aksionet e grupit farmaceutik zviceran Novartis u rritën me 3.1%, pasi kompania rishikoi për mirë parashikimin për fitimin operativ të këtij viti.