Korporata Elektroenergjetike Shqiptare (KESH) ka shpenzuar këtë vit rreth 132 mln euro për blerjen e energjisë elektrike, pasi përfundoi procedurën e fundit për sigurimin e energjisë që do të konsumohet deri më 1 nëntor.
Rezultatet e publikuara nga KESH tregojnë se për këtë periudhë janë kontraktuar gjithsej 64,800 MWh energji, të ndara në dy lote. Vlera e përllogaritur e blerjes është rreth 17.9 mln euro, pa TVSH.
Çmimi më i lartë i vitit
Sasia kryesore, prej 63 mijë MWh, është siguruar me një çmim mesatar të ponderuar prej 276.87 euro/MWh. Ky është niveli më i lartë mesatar i regjistruar në një procedurë blerjeje gjatë këtij viti. Për 1,800 MWh të tjera, çmimi mesatar i ponderuar ka rezultuar 229.75 euro/MWh.
Krahasimi me blerjen e parë të vitit e nxjerr qartë rritjen e kostos. Atëherë, për periudhën 1 korrik – 30 shtator, energjia u kontraktua me 125.47 euro për MWh, ndërsa çmimi mesatar i procedurës më të fundit është më shumë se dyfish më i lartë.
777,500 MWh për periudhën korrik – nëntor
Me këtë sasi shtesë, blerjet e kontraktuara për periudhën korrik – nëntor arrijnë në rreth 777,500 MWh, me një vlerë totale prej gati 132 mln euro, pa TVSH.
Fatura vjen në kushtet kur prodhimi vendas i energjisë elektrike mbështetet ende kryesisht te hidrocentralet, duke e bërë sistemin të varur nga reshjet. Edhe pse kapacitetet fotovoltaike po rriten, energjia diellore nuk e ka zbutur ende mjaftueshëm këtë varësi. Si rrjedhojë, gjatë periudhave të thata, blerjet e energjisë mbeten të domosdoshme për të përmbushur kërkesën për furnizim.
