Fatura financiare e Korporatës Elektroenergjetike Shqiptare për blerjen e energjisë elektrike gjatë vitit 2026 ka arritur në rreth 114 milionë euro, pa llogaritur TVSH-në. Sipas të dhënave zyrtare mbi sasitë dhe çmimet e kontraktuara, blerjet e planifikuara për periudhën korrik–tetor kapin një total prej rreth 713 mijë mWh. Çmimi mesatar i ponderuar, i përllogaritur në bazë të vëllimit të energjisë në secilin lot, rezulton rreth 159.9 euro për mWh, ndërkohë që tarifat e kontraktuara lëvizin nga 115 deri në 247.75 euro për mWh.
Vetëm për harkun kohor 14–25 tetor, institucioni ka siguruar 113,510 mWh energji, me një kosto prej rreth 27 milionë eurosh, pa TVSH. Këto blerje janë ndarë në tre lote të veçanta, ku çmimi mesatar i ponderuar arrin në rreth 238 euro për mWh. Pjesa më e madhe e këtij vëllimi, prej 69,360 mWh, është blerë me tarifën prej 247.75 euro për mWh.
Këto nivele çmimesh janë dukshëm më të larta krahasuar me transaksionet e para për këtë vit. Për periudhën 1 korrik – 30 shtator, Korporata kontraktoi 331,200 mWh me një çmim prej 125.47 euro për mWh dhe një faturë prej rreth 41.6 milionë eurosh, pa TVSH. Më pas, sasitë shtesë të siguruara për periudha të ndryshme nga gushti deri në tetor e kanë rritur faturën me rreth 72.4 milionë euro, duke e çuar totalin pranë kufirit të 114 milionë eurove.
Prodhimi vendas i energjisë elektrike vazhdon të mbështetet kryesisht te hidrocentralet, çka e ekspozon sektorin ndaj kushteve hidrologjike dhe reshjeve. Pavarësisht rritjes së kapaciteteve fotovoltaike, prodhimi diellor ende nuk e ka zbutur mjaftueshëm këtë varësi, duke bërë që në periudhat e thata importet të mbeten të pashmangshme për garantimin e furnizimit.
