Gjatë periudhës deri në muajin shtator 2026, numri i abonentëve të regjistruar në platformat dixhitale të OSHEE Group ka shënuar një ecuri pozitive, duke arritur në mbi 90 mijë klientë. Kjo shifër përfaqëson një zgjerim prej rreth 40% në krahasim me të dhënat e tre muajve më parë.
Shërbimet e kompanisë jepen nëpërmjet faqes zyrtare web dhe aplikacionit OSHEE Mobile, duke u mundësuar qytetarëve shlyerjen e faturave, administrimin e kërkesave, verifikimin e detyrimeve, sigurimin e vërtetimeve të debisë, si dhe dorëzimin e kërkesave për lidhje të reja të energjisë elektrike.
Nga totali i përdoruesve që kanë krijuar llogari, rreth 34 mijë prej tyre shfrytëzojnë aplikacionin OSHEE Mobile. Përmes këtij mjeti, qytetarët kanë mundësi të ndjekin konsumin, të shikojnë faturat mujore dhe të paguajnë energjinë elektrike nga pajisjet celulare pa paguar komision.
Zgjerimi i përdoruesve vjen si pasojë e pasurimit të platformës me funksionalitete të reja në distancë. Ndër to përfshihet ndjekja elektronike e kërkesave dhe ankesave, ku çdo abonent pajiset me një kod unik për të monitoruar statusin e çështjes deri në mbylljen e saj.
Sistemi online lejon gjithashtu verifikimin e gjendjes së debisë, përditësimin e të dhënave personale, si dhe raportimin e rasteve të mundshme të abuzimit duke bashkëngjitur foto dhe hollësi. Gjithashtu, përmes kanaleve dixhitale realizohen edhe aplikimet për matësa të rinj dhe nxjerrja e dokumenteve të detyrimeve.
