Një prej ankesave të pushuesve edhe në sezonin veror që lamë pas ishin çmimet, mos afishimi i tyre apo gjendja përballë çmimeve të ndryshuara në fatura të printuara.
Praktika në vendet e tyre apo destinacione me turizëm të zhvilluar bën që të huajt të jenë vigjilentë në vendin tonë. Ata shprehen se sigurohen fillimisht që këto rregulla të jenë të zbatuara.
“Në Shqipëri çmimet janë mesatare, por ne i kërkojmë dhe sigurohemi që ato të jenë të ekspozuara përndryshe nuk pranojmë të marrim atë shërbim,” shprehet një prej tyre.
“Në Portugali ne kështu veprojmë në çdo shërbim kërkojmë që çmimet të jenë të ekspozuara. Kemi vizituar vetëm Tiranën dhe vërejmë që kjo gjë zbatohet.”
Kjo situatë pritet të marrë përgjigje të paktën ligjërisht përmes nismës së re turizmin që do të detyrojë për transparencë çdo strukturë akomoduese, operator turistik apo agjenci udhëtimi e stacion plazhi.
Ata duhet të ekspozojnë dukshëm listat e çmimeve për produktin dhe shërbimin që ofron në gjuhën shqipe dhe angleze.
Nisma sipas operatorëve turistikë është e vonuar, por e u bë jetike pas fluksit të turistëve këtë verë dhe problematikave që dolën në pah edhe më fortë.
“Është një masë që ndihmon konkurrueshmërinë mes bizneseve po ndihmon dhe në eksperiencën e vizitorit. Besoj që ky rregullim do ndihmojë në amortizimin e situatave. Tanimë që Shqipëria është një destinacion i turizmit në Europë të kemi informalitet, se nuk dëmtohen vetëm arkat e shtetit por dhe cilësia dhe standardi i turizmit,” shprehet Blerina Ago, operatore turistike.
Detyrim transparenca e çmimeve do të jetë edhe për shezlonget të cilat deri më sot nuk kanë pasur një listë çmimesh të afishuara.
“Nuk është vetëm afishimi, por duhet të jetë një procedurë e qartë për cmimet, këto deklarohen në institucioneve përkatëse në sezonin e ulët janë këto cmimet, nga prilli në dhjetor janë këto cmime. Pra i lihet një fleksibilitet sipërmarrësit por pushuesit e dinë cili është cmimi dysheme dhe tavan dhe cfarë të presin me shpenzimet e tyre kur ta vizitojnë Shqipërinë.”
Përtej detyrimeve, ligji për Turizmin parashikon edhe lehtësira. Zgjatja e licencës pa afat për veprimtarinë e udhërrëfyesit turistik vlerësohet si lehtësim për këto struktura të cilat deri më tani detyroheshin ta rinovonin brenda 2 vjetësh.
Burimi: A2 CNN
