11.5 C
Tirana
E premte, 1 Mars 2024

Një natë në Moulin Rouge, për vetëm 1 euro

Duhen Lexuar

Airbnb ofron një tjetër nga ato raste, që vijnë një herë në jetë: të flesh në Moulin Rouge, teatri në zemër të Montmatre, simbol i Belle Époque të Parisit.

Ai krijoi një dhomë sekrete, pikërisht brenda mullirit, e cila për herë të parë në histori do të presë, për një natë, tre çifte udhëtarësh, në tre qëndrime të ndryshme – më 13, 20 dhe 27 qershor – me koston simbolike 1 euro.

Doni ta provoni? Prenotimet hapen më 17 maj në orën 19:00 në faqen Airbnb. Nuk është një konkurs, këtë qëndrim ëndrrash do ta fitojë më i shpejti.

Dhoma është e fantastike: ajo rikrijon detajet stilistike dhe dekorative të Belle Époque dhe është fryt i punës së Airbnb në bashkëpunim me Jean-Claude Yon, ekspert i historisë franceze të shekullit XIX.

“La Belle Époque është periudha e lulëzimit të artit dhe kulturës franceze dhe asgjë nuk mund t’i kujtojë ato vite më mirë se Moulin Rouge. Dhoma sekrete brenda mullirit të teatrit është menduar pikërisht si një udhëtim pas në kohë, për t’u dhënë mundësinë të ftuarve për të rijetuar kryeqytetin francez gjatë atij momenti historik”, – tha Jean-Claude Yon.

Kjo nuk do të jetë përvoja e vetme e veçantë që do t’u rezervohet të ftuarve me fat të Moulin Rouge dhe Airbnb. Pas mbërritjes së tyre, ata mund të bëjnë një tur në teatrin që ndryshoi fatin e teatrit francez dhe të hyjnë në passkenën dhe në dhomën e kostumeve vezulluese të kërcimtareve legjendare.

Do të jetë pikërisht njëra prej tyre që do t’i mirëpresë. Mikpritësja e jashtëzakonshme do të jetë balerina e parë e Moulin Rouge, Claudine Van Den Bergh.

Ajo është ylli i trupës së baletit të përbërë nga 60 kërcimtare të zgjedhura për aftësi dhe gjatësi (duhet të jenë të gjitha të gjata mbi 1.75 metra), që çdo natë kërcejnë në një nga spektaklet më të bukura në botë. Quhet “Féerie”, një shfaqje e jashtëzakonshme me mbi një mijë kostume, për të cilën kushdo që fiton mundësinë për të jetuar këtë përvojë do të ketë edhe një vend nderi.

“Pjesëmarrja në një shfaqje në Moulin Rouge u jep njerëzve një moment arratisje nga realiteti. Atmosfera, e frymëzuar nga Belle Époque në mullirin tonë të dashur, do t’i transportojë udhëtarët në vitet kur lindi kjo kabare”, – tha Claudine Van Den Bergh.

Në fund të mbrëmjes, të ftuarit mund të shijojnë një darkë private jashtë mullirit, të përgatitur nga shefi Arnaud Demerville. Në të njëjtën tarracë romantike, do të shërbehet mëngjesi të nesërmen.

Moulin Rouge ndodhet në lagjen parisiene Montmartre. Mulliri me erë i kuq ka qenë një pikë ndalese që në fillimet e tij, edhe pse struktura origjinale u dogj në vitin 1915. Mulliri me erë aktual u ndërtua në vitin 1920.

Për shumë turistë parisienë, vizita në Qytetin e Dritës nuk është e plotë, nëse nuk shihni Mullirin, ndërsa ata që duan një përvojë unike duhet të hyjnë brenda për të parë shfaqjen kabare “Féerie”.

Mulliri është edhe skenar i filmit të Baz Luhrmann në vitin 2001 “Moulin Rouge!”, i cili rizgjoi interesin për kabarenë dhe historinë e saj, dhe së fundmi ka krijuar një shfaqje të suksesshme në Broadway.

Burimi:Monitor
- Reklama -
spot_img
- Reklama -

Artikujt e Fundit