Presidenti i Republikës, Bajram Begaj, priti në Pallatin e Brigadave senatorët e Shteteve të Bashkuara të Amerikës, Jeanne Shaheen dhe Dick Durbin, të cilët u nderuan me titullin e lartë Komandar i Urdhrit Suprem të Shqiponjës. Në këtë takim, ku senatorët u shoqëruan nga Ambasadori i SHBA-ve në Tiranë, Eric Wendt, u vlerësua partneriteti strategjik dhe aleanca e qëndrueshme mes dy vendeve, e mbështetur në vlerat e përbashkëta demokratike dhe sigurinë Euroatlantike.
Kreu i Shtetit shprehu mirënjohjen për mbështetjen e vazhdueshme amerikane ndaj Shqipërisë në proceset e integrimit, forcimin e institucioneve demokratike, reformën në drejtësi dhe rritjen e kapaciteteve mbrojtëse. Ai theksoi rëndësinë e bashkëpunimit në kuadër të NATO-s dhe angazhimin e SHBA-ve në Ballkanin Perëndimor për paqen, stabilitetin dhe perspektivën euroatlantike të rajonit, përfshirë kontributin në sigurinë e Kosovës përmes KFOR-it. Vëmendje iu kushtua edhe Bordit të Paqes dhe mbështetjes së nismave ndërkombëtare për dialog.
Gjatë ceremonisë, Presidenti Begaj u shpreh se bashkëpunimi i shkëlqyer politik krijon mundësi për konkretizim në fusha si energjia, investimet, mbrojtja, mbrojtja kibernetike dhe infrastruktura. Kreu i Shtetit vlerësoi kontributin e veçantë të senatorëve amerikanë në forcimin e partneritetit strategjik dypalësh, si dhe mbështetjen për paqen dhe sigurinë në Ballkanin Perëndimor.
