Përtej frikës se zhvillimi i teknologjisë do të lërë pa punë miliona njerëz, tregu i punës po dëshmon një realitet tjetër. Byroja e Statistikave të Punës raportoi se ekonomia amerikane shtoi 162 mijë vende pune në muajin gusht, ndërsa norma e papunësisë zbriti në 4.1%. Edhe të rinjtë e moshës 20-24 vjeç, shpesh të konsideruar si më të rrezikuarit nga Inteligjenca Artificiale (IA), po shfaqin tregues pozitivë me norma papunësie pranë niveleve më të ulëta të dekadave të fundit.

Megjithatë, tronditjet nuk mungojnë. Gjigantë të teknologjisë si Microsoft dhe Meta, si dhe kompani më të vogla si Block dhe Intuit, kanë shkurtuar pozicione pune ose kanë zëvendësuar stafin me robotë softuerikë. Sipas konsulencës Challenger, Gray & Christmas, kompanitë amerikane kanë njoftuar mesatarisht rreth 16 mijë shkurtime në muaj të lidhura me këtë teknologji. Këto shifra mbeten megjithatë të vogla krahasuar me qarkullimin e përgjithshëm në tregun e punës.

Infrastruktura dhe ndërtimi në qendër të kërkesës

Shpenzimet masive për ngritjen e qendrave të të dhënave, prodhimin e energjisë dhe pajisjet e nevojshme janë rreth 500 miliardë dollarë në vit më të larta se në vitin 2022, sipas Goldman Sachs. Ndërtimi i qendrave të të dhënave po ecën me një ritëm vjetor prej mbi 75 miliardë dollarësh, duke rritur ndjeshëm kërkesën për elektricistë, teknikë dhe inxhinierë. Platforma Indeed konstaton se pagat për instalim dhe mirëmbajtje në këto qendra janë rreth 40% më të larta se në sektorë të tjerë.

Roli i IA në krijimin e profesioneve të reja

Përveç punonjësve të kantierit dhe infrastrukturës, teknologjia po gjeneron role të reja për profesionistët e zyrave. Sipas vlerësimeve, rreth 1% e vendeve profesionale të punës në Amerikë tashmë konsiderohen pozicione të lidhura drejtpërdrejt me IA, duke përfshirë inxhinierë modelesh, etiketues të dhënash dhe drejtues të posaçëm. Rritja e produktivitetit po ndihmon gjithashtu profesione të caktuara, ku asistentët ligjorë dhe analistët e tregut kanë shënuar rritje të punësimit ndërmjet viteve 2023 dhe 2025.

Nga ana tjetër, disa sektorë po vuajnë. Punonjësit e shërbimit ndaj klientit kanë rënë me rreth 10%, ndërsa sekretarët dhe asistentët administrativë kanë shënuar një rënie prej rreth 15ë që nga janari i vitit 2023. Byroja e Statistikave të Punës parashikon se sektorët e mbështetjes administrative mund të humbasin 752 mijë vende pune deri në vitin 2035, por historia e tregut dëshmon se teknologjitë e reja vazhdojnë të hapin horizonte të reja punësimi.