Projektligji i ri për pagesat: transfertat e nisura para falimentimit të një banke nuk anulohen

Transfertat financiare që kanë hyrë në sistemin e pagesave do të mbeten të vlefshme edhe nëse një bankë apo institucion tjetër pjesëmarrës falimenton. Kjo është një nga risitë kryesore të projektligjit të ri për sistemin e pagesave dhe kolateralin financiar, që synon të parandalojë bllokimin ose anulimin e pagesave të nisura përpara hapjes së procedurave të falimentimit.

Sipas dokumentit, kur një bankë ose institucion pjesëmarrës shpallet i paaftë për të paguar, transfertat që janë futur në sistem para nisjes së procedurës së falimentimit nuk mund të anulohen. Në praktikë, vështirësitë financiare të një institucioni nuk duhet të pengojnë pagesat që janë tashmë në qarkullim dhe as të krijojnë pasiguri për pjesëmarrësit e tjerë.

Më shumë kompetenca për Bankën e Shqipërisë

Projektligji forcon ndjeshëm rolin e Bankës së Shqipërisë. Asnjë sistem pagesash nuk do të mund të funksionojë pa licencimin ose miratimin e saj. Banka Qendrore do të ketë kompetenca më të gjera për të mbikëqyrur operatorët, për të përcaktuar standarde dhe për të ndërhyrë kur konstatohen shkelje.

Për operatorët që nuk zbatojnë kërkesat parashikohen gjoba nga 500 mijë deri në 3 milionë lekë. Në rastet kur shkeljet përsëriten, licenca mund të pezullohet ose të revokohet.

Rregulla më të qarta për kolateralin financiar

Një pjesë e rëndësishme e ndryshimeve lidhet me kolateralin financiar, domethënë pasuritë që një bankë ose institucion financiar vendos si garanci për të siguruar një detyrim. Këtu përfshihen paratë, instrumentet financiare dhe pretendimet që burojnë nga kreditë.

Nëse detyrimi nuk shlyhet, pala që ka marrë kolateralin do të mund ta shesë, ta përdorë ose të kompensojë vlerën e tij për të mbuluar detyrimin, në përputhje me kushtet e marrëveshjes. Në disa raste, ky veprim mund të kryhet pa pasur nevojë për miratim paraprak nga gjykata. Projektligji përcakton gjithashtu rregulla për përparësinë e këtyre garancive ndaj kreditorëve të tjerë.

Krijohet Komiteti Kombëtar i Sistemit të Pagesave

Ndër ndryshimet e tjera është ngritja e Komitetit Kombëtar të Sistemit të Pagesave. Ky organ do të ndihmojë në bashkërendimin e institucioneve dhe në përmirësimin e funksionimit të tregut të pagesave.