Qeveria pritet të marrë një kredi të dytë në funksion të qëndrueshmërisë dhe zhvillimit të gjelbër me një vlerë 120 milionë dollarë. Dokumenti me informacionin e programit për këtë kredi parashikon që data e vlerësuar e aprovimit të jetë 12 shkurt 2025.
“Qëndrueshmëria e dytë dhe zhvillimi i gjelbër” është një kredi pjesë e Kornizës së Partneritetit 2023-2027 që Banka Botërore ka me vendin tonë. Ky program parashikon disa objektiva zhvillimi të tilla si: (i) të forcojë qëndrueshmërinë e sektorit qeveritar dhe familjeve; (ii) të forcojë kornizën e tregut të energjisë dhe të rrisë energjinë e rinovueshme dhe eficiencën e energjisë; dhe (iii) të mbrojë mjedisin dhe të zvogëlojë emetimin e karbonit të vendit. Por çfarë paraqesin më në detaj tre shtyllat e projektit sipas dokumentit.
Shtylla 1 mbështet reformat që synojnë forcimin e qëndrueshmërisë së sektorit qeveritar dhe familjeve. Programi mbështet dy veprime politikash që synojnë forcimin e pajtueshmërisë tatimore dhe zgjerimin e bazës tatimore.
“Së pari, DPL2 mbështet miratimin dhe zbatimin e akteve nënligjore nga Tatimi mbi të Ardhurat, amendimet e Ligjit për Turizmin, i cili zgjeron përkufizimin dhe mbikëqyrjen e qeverisë për aktivitetet turistike duke përfshirë qiratë afatshkurtra. Gjithashtu, për ta çuar Shqipërinë më pranë Standardeve të Raportimit Evropian të Qëndrueshmërisë, DPL2 ka mbështetur futjen e sigurimit të qëndrueshmërisë nëpërmjet miratimit nga Parlamenti të ndryshimi të ligjit ekzistues të auditimit.
Për të mundësuar përafrimin e politikave buxhetore me objektivat e ndryshimeve klimatike, DPL2 mbështet përfshirjen e treguesve të performancës të lidhura me klimën në procesin e buxhetit afatmesëm. Së fundi, për të përmirësuar standardet dhe kapacitetet administrative të shërbimeve ekzistuese të kujdesit social, DPL2 mbështet krijimin e Fondit Social në nivel i njësisë së qeverisjes vendore.
Shtylla 2 mbështet reformat që synojnë forcimin e kornizës së tregut të energjisë dhe rritjen e energjisë së rinovueshme dhe eficiencës i energjisë. Nën Shtyllën 2, dhe në vazhdimin e reformave të mbështetura me DPL1(programi i parë me financim 116 mln USD), DPL2 mbështet krijimin e Operatorit të Energjisë së Rinovueshme dhe miratimin e masave mbështetëse për rritjen e investimeve private në prodhimin e enetgjisë nga burime të energjisë diellore dhe erës dhe skemat mbështetëse për përdorimin familjar të burimeve të rinovueshme të energjisë në sektorët e ngrohjes dhe ftohjes.
Përveç kësaj, për të promovuar një treg të organizuar me shumicë, DPL2 mbështet prezantimin e tregtimit të detyrueshëm të energjisë përmes ALPEX. Së fundi, për të futur efiçencën e energjisë në sektorin publik, DPL2 mbështet aplikimin e standardeve të efiçiencës së energjisë në të gjitha procedurat e prokurimit publik.
Shtylla 3 mbështet reformat që synojnë mbrojtjen e mjedisit dhe reduktimin e emetimit të karbonit në vend.
Nën shtyllën 3, për të reduktuar degradimin mjedisor dhe për të zbutur rreziqet klimatike, DPL2 mbështet prezantimin e Përgjegjësisë së Zgjeruar të Prodhuesit, e cila mandaton që prodhuesit e emetimeve specifike të mbetjeve të jenë përgjegjës për menaxhimin mbetjeve të tyre. Me objektivin për të reduktuar emetimet e GHG, DPL2 gjithashtu mbështet futjen e një takse të karbonit për qymyrin, si dhe miratimin e paketës rregullatore për zbatimin e ligjit për gazrat e fluorizuar./N.Maho
Postimi ” Qeveria kredi të re 120 mln USD tek BB për politikat e zgjerimit të bazës tatimore dhe energjinë ” eshte marre nga Revista Monitor.
