Qeveria shqiptare po përgatit një sistem të ri për menaxhimin e baterive, i cili përfshin grumbullimin, trajtimin dhe riciklimin e tyre. Projektvendimi parashikon ngritjen e rreth 5 mijë pikave të grumbullimit për bateritë portative në shkallë kombëtare, me një investim fillestar të vlerësuar nga 250 deri në 350 mijë euro.
Qëllimi kryesor i nismës është ulja e sasisë së baterive që përfundojnë në landfill, përmes një sistemi të integruar që mbulon gjithë zinxhirin, që nga hedhja e produktit në treg deri te riciklimi dhe rikuperimi i materialeve.
Sasitë në rritje
Analiza që shoqëron projektaktin tregon se në vitin 2026 në tregun shqiptar janë vendosur rreth 7,423 ton bateri. Sipas parashikimeve, deri në vitin 2035 kjo sasi do të kalojë 10 mijë ton.
Kush i paguan kostot
Buxheti i shtetit nuk do të financojë drejtpërdrejt grumbullimin dhe riciklimin. Kostot do t’i mbulojnë prodhuesit, importuesit dhe organizatat e përgjegjësisë së zgjeruar të prodhuesit.
Pasaporta dixhitale
Ndër risitë e projektvendimit është pasaporta dixhitale e baterisë, e cila do të lejojë gjurmimin e saj gjatë gjithë ciklit jetësor. Gjithashtu, vendosen kërkesa për gjurmën e karbonit dhe për përmbajtjen e materialeve të ricikluara.
Akti synon përafrimin e legjislacionit shqiptar me rregulloren e Bashkimit Evropian dhe parashikon shfuqizimin e rregullave ekzistuese të vitit 2012 për bateritë dhe mbetjet e tyre.
