Fuqia blerëse e punonjësve në ekonomitë kryesore evropiane pritet të përballet me vështirësi gjatë periudhës 2026–2027. Sipas raportit më të fundit të Organizatës për Bashkëpunim dhe Zhvillim Ekonomik (OECD), “Employment Outlook 2026”, pagat reale – të korrigjuara për efektin e inflacionit – pritet të tkurren në Itali, Spanjë, Francë dhe Mbretërinë e Bashkuar nga tremujori i parë i vitit 2026 deri në të njëjtën periudhë të vitit 2027. Në këtë grup ekonomish të mëdha, Gjermania shfaqet si i vetmi përjashtim pozitiv.

Raporti thekson se pasiguritë gjeopolitike dhe rritja e çmimeve të energjisë rrezikojnë të dobësojnë tregjet e punës, teksa presionet e vazhdueshme inflacioniste ulin fuqinë blerëse. Këto parashikime mbështeten në hipotezën se pengesat e shkaktuara nga tensionet në Lindjen e Mesme do të mbeten domethënëse, por me kohëzgjatje të kufizuar.

Pritshmëritë për eurozonën dhe goditja më e rëndë në Itali

Për të gjithë zonën e euros, pagat reale parashikohet të regjistrojnë një ulje prej rreth 0.4% rreth mesit të vitit 2026, për t'u kthyer në nivelin e fillimit të vitit vetëm në tremujorin e parë të 2027-s. Më pas, deri në fund të vitit 2027, pritet një rritje prej 0.7%.

Humbjen më të madhe pritet ta pësojë Italia, ku pagat reale vlerësohet të ulen me 1.9% në tremujorin e tretë të vitit 2026. Edhe në fund të vitit 2027, ato parashikohet të mbeten 0.6% nën nivelin e fillimit të vitit 2026. Ekspertët e OECD-së ia atribuojnë këtë situatë kostove të larta të energjisë dhe varësisë së lartë të Italisë nga importi i gazit dhe naftës.

Në Spanjë, rënia pritet të jetë më e përmbajtur, por e vazhdueshme: pagat parashikohen të jenë 0.7% më të ulëta në fund të 2026-s dhe të ruajnë këtë nivel përgjatë tërë vitit 2027. Ndërkohë, në Mbretërinë e Bashkuar ulja pritet të shkojë deri në 1.6% në mbyllje të vitit 2026, e pasuar nga një rikuperim që do t'i pozicionojë pagat reale 1% mbi nivelin bazë në fund të 2027-s. Në Francë tkurrja do të jetë më e lehtë, me një rënie prej 0.5% në tremujorin e dytë të vitit 2026 dhe një përmirësim gradual në 0.1% mbi nivelin fillestar në fund të vitit 2027.

Pse Gjermania shënon rritje?

Gjermania është e vetmja nga pesë vendet e analizuara ku të ardhurat reale pritet të zgjerohen gjatë gjithë horizontit kohor. Rritja parashikohet të arrijë në 0.5% deri në fund të vitit 2026 dhe të përshpejtohet në 1.7% deri në mbyllje të 2027-s.

Sipas raportit, ky qëndrueshmëri mundësohet nga një treg pune relativisht i fortë, mungesa e vazhdueshme e punonjësve të kualifikuar dhe rritjet e zbatuara në pagën minimale, të cilat po mbajnë në nivele të favorshme ritmin e kompensimit të punonjësve gjermanë.