Pronarët e apartamenteve që nuk shlyejnë tarifat e administrimit të pallateve rrezikojnë tani kamatëvonesa të larta, ndjekje përmbarimore dhe madje kufizimin e pronës në Kadastër. Këtë e parashikon rregullorja e re e miratuar nga qeveria dhe e botuar në Fletoren Zyrtare më 23 tetor, e cila përcakton në detaje si zbatohen detyrimet financiare dhe si administrohen ndërtesat e banimit.

Tarifa e administrimit nuk është detyrim i ri. Ajo ishte e parashikuar që në ligjin e vitit 2009, por kuadri ligjor i miratuar në vitin 2025 i ka shtrënguar ndjeshëm masat ndaj pronarëve që nuk paguajnë.

Kamatëvonesa trefishohet

Një nga ndryshimet kryesore prek kamatëvonesën. Nëse në legjislacionin e mëparshëm ajo ishte 10% e tarifës mujore, tani rritet në 30% për çdo muaj vonesë.

Kufizimi i pronës në Kadastër

Risia më e rëndësishme është mundësia që prona të kufizohet në Kadastër. Administratori mund ta kërkojë këtë masë kur pronari nuk ka paguar tarifat për të paktën 12 muaj, ose kur borxhi i papaguar arrin të paktën 0.5% të vlerës së apartamentit. Pas ndjekjes së procedurave ligjore, prona nuk mund të shitet, të transferohet apo të ngarkohet me barrë derisa detyrimi të shlyhet.

Masa nuk zbatohet automatikisht. Procedura parashikon disa hapa:

  • kryesia e pallatit duhet të marrë vendim me shumicë të cilësuar;
  • pronari njoftohet me shkrim të paktën 10 ditë para marrjes së vendimit;
  • Kadastra ka 15 ditë për të regjistruar kufizimin pas paraqitjes së dokumentacionit;
  • pas shlyerjes së borxhit dhe depozitimit të vërtetimit bankar, kufizimi hiqet brenda pesë ditëve.

Tarifa paguhet edhe për apartamentet bosh

Rregullorja sqaron se tarifa mujore detyrohet të paguhet edhe kur apartamenti është bosh, nuk përdoret nga pronari ose është dhënë me qira. Shuma e tarifës përcaktohet nga asambleja e bashkëpronarëve, ndërsa kur nuk arrihet dakordësi zbatohet tarifa e referencës e miratuar nga këshilli bashkiak. Njësitë ku ushtrohet veprimtari tregtare duhet të paguajnë tarifa më të larta se apartamentet e banimit.

Llogari bankare dhe fond rezervë

Ndryshime ka edhe në administrimin financiar të pallateve. Parashikohet hapja e llogarive bankare për mbledhjen e tarifave dhe për menaxhimin e fondit rezervë, i cili do të përdoret për mirëmbajtje, riparime dhe ndërhyrje emergjente. Bashkitë marrin përsipër mbikëqyrjen e zbatimit të standardeve të mirëmbajtjes së ndërtesave.

Rregullorja hyn në fuqi me botimin në Fletoren Zyrtare dhe synon të formalizojë më tej administrimin e pallateve, duke garantuar fondet e nevojshme për mirëmbajtjen e hapësirave të përbashkëta. Ajo konkretizon dispozitat e ligjit të vitit 2025, me procedura më të qarta për detyrimet financiare, përgjegjësitë e administratorëve dhe të drejtat e bashkëpronarëve.