Infrastruktura e re e pagesave të menjëhershme në Shqipëri, e ndërtuar përmes projektit TIPS Clone, pritet të gjenerojë kursime deri në 38.7 miliardë lekë në vit, ose rreth 1.5% të Prodhimit të Brendshëm Bruto. Vlerësimin e bëri Guvernatori i Bankës së Shqipërisë, Gent Sejko, gjatë Konferencës së 8-të Ndërkombëtare të Skemave Rajonale të Kartave dhe Infrastrukturave të Tregut Financiar për Pagesat me Vlerë të Vogël.

Sipas Guvernatorit, transaksionet e para përmes sistemit të pagesave të shpejta (instant payment) pritet të kryhen gjatë këtij muaji. Për qytetarët, ky ndryshim do të thotë që paratë bëhen të disponueshme menjëherë, ndërsa bizneset do të përfitojnë arkëtime më të shpejta dhe një menaxhim më efikas të likuiditetit.

Kursimet sipas studimit të Bankës Botërore

Sejko iu referua një studimi të përbashkët të Bankës Botërore dhe Bankës së Shqipërisë për të ilustruar përfitimet ekonomike të projektit.

“Lidhur me përfitimet ekonomike të TIPS Clone, sipas një studimi të përbashkët të Bankës Botërore dhe Bankës së Shqipërisë, përdorimi i pagesave elektronike, i mbështetur nga infrastruktura e pagesave të menjëhershme, mund të gjenerojë deri në 38.7 miliardë lekë kursime në vit, ose rreth 1.5% të PBB-së. Ndërkohë, zëvendësimi i gjysmës së pagesave të faturave me para në dorë me pagesa elektronike mund t’u kursejë konsumatorëve mbi 500 milionë lekë dhe bizneseve rreth 1 miliard lekë në vit”

Ndikimi në formalizimin e ekonomisë

Modernizimi i sistemit të pagesave lidhet drejtpërdrejt edhe me formalizimin e ekonomisë. Transaksionet elektronike e bëjnë aktivitetin e bizneseve më të gjurmueshëm dhe ndihmojnë në ndërtimin e një historiku financiar më të besueshëm, gjë që mund të lehtësojë vlerësimin e aftësisë paguese dhe aksesin në kredi, sidomos për ndërmarrjet e vogla.

“Në këtë kuadër, edhe qeveria shqiptare ka ndërmarrë nisma si “Shqipëria Cashless”, që synon zgjerimin e pagesave digjitale dhe reduktimin e përdorimit të parasë fizike. Zgjerimi i pajisjes së pikave të shitjes me terminale POS/POI, fiskalizimi dhe faturimi elektronik janë masa plotësuese që mbështesin transparencën dhe formalizimin e aktivitetit ekonomik. Suksesi i tyre kërkon që detyrimet të shoqërohen me shërbime të thjeshta, kosto të përballueshme dhe informim të qartë për bizneset e qytetarët”

Guvernatori theksoi se rritja e përdorimit të pagesave digjitale është tashmë e dukshme. Numri i tyre për frymë ka arritur në 29 në vit, krahasuar me vetëm 5 një dekadë më parë, ndërsa ritmi vjetor i rritjes është rreth 25%.