Shqipëria ka mbyllur zyrtarisht kapitullin e parë të negociatave me Bashkimin Europian. Lajmi u bë i ditur nga kryeministri Edi Rama nëpërmjet një postimi në rrjetet sociale, ku konfirmoi gjithashtu se është dhënë drita jeshile për mbylljen e negociatave të Kapitullit 20.
Në njoftimin e tij, kryeministri Rama u shpreh se: “SHQIPËRIA MBYLL KAPITULLIN E PARË, nis numërimi mprapsht i kohës drejt objektivit historik! Drita jeshile nga BE për mbylljen e negociatave të Kapitullit 20 forcon perspektivën për investime, inovacion, konkurrueshmëri dhe punësim”.
Kapitulli 1 i bisedimeve për anëtarësim trajton çështjen e lëvizjes së lirë të mallrave dhe bën pjesë në Grupkapitullin 1 që mbulon themeloret. Nga ana tjetër, Kapitulli 20 lidhet me sipërmarrjen dhe politikën industriale, duke qenë pjesë e grupkapitullit të tretë për konkurrueshmërinë dhe rritjen gjithëpërfshirëse.
Sipas një njoftimi të shpërndarë nga MIA, Komiteti i Përfaqësuesve të Përhershëm të Shteteve Anëtare të Bashkimit Evropian i njohur si COREPER ka miratuar mbajtjen e Konferencës Ndërqeveritare Shqipëri-BE më 13 tetor 2026 në Luksemburg. Gjatë kësaj konference pritet të zyrtarizohet mbyllja e përkohshme e negociatave për Kapitullin 20.
Ky zhvillim vlerësohet si një tjetër sukses në procesin integrues të vendit, duke pasqyruar vlerësimin pozitiv nga Komisioni Evropian dhe shtetet anëtare për suksesin e reformave në fushën industriale dhe të sipërmarrjes. Vendimi konfirmon përafrimin me standardet evropiane dhe rritjen e kapaciteteve për zbatimin e politikave mbështetëse për biznesin.
Me këtë hap më 13 tetor, Kapitulli 20 do të shënojë kapitullin e katërt të negociatave që vendi mbyll në mënyrë të përkohshme brenda një periudhe tremujore, ndërsa autoritetet mbeten të angazhuara për të çuar përpara reformat e nevojshme.
